Давлат активларини бошқариш агентлиги ижтимоий тармоқда кенг жамоатчилик томонидан билдирилаётган фикрларни инобатга олган ҳолда Қорақалпоғистон Республикаси ҳудудий бошқармаси учун Trailblazer автомобилини сотиб олиш фикридан қайтди.
Агентликнинг Қорақалпоғистон Республикаси ҳудудий бошқармаси томонидан 398 миллион сўмга Trailblazer сотиб олингани ҳақида Telegram’даги «davletovuz» канали томонидан хабар берилган. Агентлик эса мазкур хабарга раддия берган.
Давлат активларини бошқариш агентлигининг маълум қилишича, агентликнинг Қорақалпоғистон Республикаси ҳудудий бошқармаси 2020 йил 2 ноябрь куни давлат харидлари сайтига Қорақалпоғистоннинг ҳудуд шароитларида фойдаланиш мақсадида автомобилнинг йўл танламас тури бўлган Trailblazer автомобилини харид қилиш бўйича эълон берган. 9 ноябрга қадар пул ўтказиш шарти билан шартнома тузилган.
«Лекин, сўнгги вақтларда ижтимоий тармоқда кенг жамоатчилик томонидан билдирилаётган турли фикрлар инобатга олинган ҳолда агентлик томонидан ушбу хариддан воз кечилган ва автомобиль сотиб олинмаган», — дейилади агентлик хабарида.
Аввалроқ Зарбдор тумани ҳокими Зафар Рўзиев Captiva хизмат машинаси бўла туриб, 370 миллион сўмга Trailblazer, шунингдек, пандемия даврида Учқўрғон, Поп, Қўшработ ва Нарпай туманлари ҳокимликлари ҳам Trailblazer сотиб олгани тўғрисида хабар берилганди. Денов тумани ҳокимлиги эса карантин кучайтирилган пайтда — 2020 йилнинг июлида 398 миллион сўмга Trailblazer LTZ-АТ, Наманган вилояти ҳокимлиги ҳам июлда бюджет маблағлари ҳисобидан 1 миллиард 579 миллион сўмга Toyota LC200 автомобилини ҳамда сентябрь ойида қарийб 400 миллион сўмга Trailblazer LTZ-АТ русумли автомобиль харид қилган.
Бундан ташқари, Қорақалпоғистон Республикаси Жўқорғи Кенгеси 883 миллион сўмга Toyota Prado, Мирзачўл тумани ҳокимлиги 370 миллион сўмга Trailblazer, Қашқадарё вилояти ҳокимлиги ҳоким ўринбосарига 349 миллион сўмга Equinox, ҳокимнинг хотин-қизлар масалалари бўйича маслаҳатчисига, ёрдамчиси ҳамда ишлар бошқармаси бошлиғига 621 миллион сўмга 3 та Tracker хизмат машиналари сотиб олган.
Изоҳ (0)