Олий Мажлис Сенати ва Гендер тенглиги масалалари бўйича комиссия раиси Танзила Норбоева 12 ноябрь куни бўлиб ўтган матбуот анжуманида болалар боғчасидан тортиб то олий таълимгача жинсий тарбиядан таълим берилиши зарурлиги ҳақида гапирди. Бу ҳақда «Gazeta.uz» хабар бермоқда.
«Гинеколог масаласида қизлар кўринмаслиги керак деган стереотиплар бор. Жинсий тарбия масаласи биз учун ёпиқ мавзу ҳисобланади. Ҳеч ким гапириши мумкин эмас. Деярли кўп оилаларда, ҳаттоки ота-она ҳам фарзандларига шу нарсаларни гапирмайди. Бу нотўғри. Биз ўйлаймизки, жинсий тарбияни ёш болаликдан олиб бориш керак», — дейди Сенат раиси.
Президент ташаббуси билан мактабларга киритилган тарбия дарсида, албатта, жинсий тарбия, гендер тенглик масаласи кўриб чиқилади. Гендер тенглиги масалалари бўйича комиссия вазирликларга шундай топшириқ қўйган.
Қизлар ва ўғил болаларга бу борада алоҳида билим бериш режалаштирилган. «Ўқув дастурларини шу даражада нозиклик, билим билан қилишимиз керакки, ўғил бола, қиз болага керакли билимни беришимиз лозим», — дея қўшимча қилган комиссия раиси.
«Мактабгача таълимда ёшга мос қилиб, ўзини доирасида, юқори синфларда ва олий таълим муассасаларида қизлар ва ўғил болаларни оилага тайёрлаш, репродуктив саломатлик, туғиш, сақланиш, қариндош уруғлик никоҳлари ва бошқалар тўғрисида очиқдан-очиқ маълумотларни беришимиз керак», — деган Танзила Норбоева.
Соғлиқни сақлаш вазири ўринбосари Элмира Боситхонова Ўзбекистонда қизларнинг касалини яшириш ҳолатлари одат бўлиб қолганини, бу масалани ҳал этиш мақсадида Президент поликлиникаларда «қизлар саломатлик маркази»ни очишни таклиф қилганини айтиб ўтган. «Ўсмир қизларни биз, албатта, тиббий кўрикдан ўтказишимиз керак. Уларнинг касалини эрта топишимиз керак», — деб таъкидлаган у.
Изоҳ (0)