Мажбурий ижро бюросининг Булоқбоши туман бўлими давлат инспекторини темир труба билан уриб, дўппослаган шахсга нисбатан суд ҳукми ўқилди. Бу ҳақда «Дарё»га Жиноят ишлари бўйича вилоят суди судья катта ёрдамчиси Комроншоҳ Расулов маълум қилди.
Мазкур ишни кўриб чиққан Жиноят ишлари бўйича Жалақудуқ туман судида Булоқбоши туманида яшовчи судланувчи И.Б. асосий иш фаолияти хонадонида мебель тайёрлаш эканлигини айтиб, туман электр тармоқлари корхонасининг тавсиясига асосан тадбиркорлик фаолияти учун алоҳида электр ҳисоблагич ўрнатганини билдирган. Шунингдек, у 2019 йил 8 июль куни кўчада ишлари билан юрган вақтда МИБнинг туман давлат инспектори З.З. унинг яшаш хонадонига келиб, электр энергияси ва табиий газдан бўлган қарздорлигини тўлаб қўйиши лозимлигини маълум қилиб, талабнома ташлаб кетганини айтган.
«Ушбу талабнома ташлаб кетилганлигини орадан бир ойча вақт ўтиб, МИБ ходими қайта келганида билдим. Шунда инспектор нима сабабдан ҳалигача қарздорликни тўламаганлигимни сўраб, менга талабнома берилган муддатда бажарилиши мажбурийлигини тушунтирди. Кеч хабар топганим учун унга бир соат муддат берса, қарздорликни бартараф қилишимни айтиб, илтимос қилдим. Лекин у гапларимга қулоқ солмасдан узиш учун электр ҳисоблагичнинг олдига бориб, узмоқчи бўлаётганида асабим бузилиб, жаҳлим чиқди. Кейин ёнимда турган тахминан бир метр узунликдаги темир трубани олиб, инспекторнинг елка аралаш бел соҳасига бир маротаба уриб юбордим. Шунда онам ва синглим МИБ ходимига қаршилик кўрсатмаслигим кераклигини айтиб, тинчлантиришга уринди. Қилган ишимдан пушаймонман», — деди судланувчи И.Б.
Суд судланувчи И.Б.ни айбли деб топиб, қилмиши учун унга нисбатан икки йил муддатга озодликни чеклаш жазосини тайинлаган.
