Литва Островец шаҳридаги атом электр станцияси БелАЭСни ишга тушириш чоғида 8 ноябрь куни юз берган ҳодиса ҳақида Беларусдан расмий маълумот сўрамоқда. Бу ҳақда «Gazeta.uz» хабар берди.
Литва Ташқи ишлар вазирлиги матбуот хизматининг хабар беришича, мамлакат ва бутун халқаро ҳамжамият учун БелАЭСдаги вазият ҳақида фактларга асосланган расмий маълумотга таяниш муҳим ҳисобланади. Шу муносабат билан ҳодиса, унинг сабаблари ҳамда станцияни ишга тушириш жараёнига ва атом хавфсизлигига таъсири ҳақида маълумот сўралган.
Литва хавфсизлик маданиятини таъминлаш муҳимлигини ҳам таъкидлаган. Шунингдек, Литва Беларусни ядро хавфсизлигининг энг юқори стандартлари, стресс-тест бўйича экологик талаблар ва тавсиялар тўлиқ бажарилмагунча ядро қурилмасини ишга туширишни тўхтатишга чақирган.
БелАЭС 7 ноябрь куни Александр Лукашенко томонидан тантанали равишда очиб берилган. Очилиш маросимида Лукашенко Беларусь қудратли ядро давлатига айланишини маълум қилган. У «Росатом» бош директори Алексей Лихачёв билан Россия давлат корпорациясининг филиалини ташкил қилишни, БелАЭСда қўшимча реакторлар қурилиши эҳтимолини, минтақада кўп миқдорда энергия ишлаб чиқаришни йўлга қўйишни, бошқа мамлакатларда ҳамкорликда атом электростанциялари қуришни муҳокама қилган.
9 ноябрь куни эса (баъзи манбаларда 8 ноябрь куни) АЭСнинг биринчи энергоблокида кучланиш трансформаторларининг ишдан чиқиши сабабли турбина тўхтатилгани ҳақида маълумот пайдо бўлди. Беларусь Энергетика вазирлигининг хабар беришича, атом электростанциясида «алоҳида электротехник ўлчов қурилмаларини алмаштириш зарурати аниқланган, мазкур қурилмани алмаштириш ишлари эса технологик регламентга асосан амалга оширилмоқда». 10 ноябрь куни Беларусь Давлат атом назорати хизмати алмаштирилиши керак бўлган электротехник ўлчов қурилмаси хавфсизликнинг 4-синфига тааллуқли эканлиги ва объектнинг ядровий ва радиацион хавфсизлигига таъсир қилмаслиги ҳақида хабар берди.
Литва Ташқи ишлар вазирлиги «хавфсиз бўлмаган Островец атом электр станцияси» ишга туширилишидан аввал Беларусга норозилик нотасини жўнатган. Нотада «нафақат Беларусь ёки Литва, балки бутун Европада ядро таҳдиди ва атроф-муҳитга таҳдидни кучайтирадиган Беларуснинг масъулиятсиз ҳаракатлари» қораланган.
Литва пойтахти Вилнюс шаҳри мерияси шаҳар аҳолисига мурожаат қилган ва Беларусда АЭСнинг ишга туширилиши муносабати билан 17 ноябргача дорихоналардаги бепул ёд таблеткаларидан захира қилиб қўйишни сўраган.
БелАЭС
Беларусдаги биринчи атом электр станциясининг қурилиши 2011 йилнинг июль ойида бошланган. Унинг қурилиши учун Россиянинг «ВВЕР-1200» сув-сув реакторига эга «АЭС-2006» лойиҳаси танланган. Станция Беларуснинг шимоли-ғарбий чегарасида, Гродно вилоятининг Островец шаҳридан 18 километр узоқликдаги Ворняни шаҳарчасида — Литва пойтахти Вилнюсдан 40 километр узоқликда жойлашган. АЭСни қуриш бўйича Беларуснинг асосий ҳамкори «Росатом» давлат корпорациясининг «Атомстроекспорт» компанияси бўлган.
БелАЭСнинг 7 ноябрь куни ишга туширилган биринчи энергоблоки мамлакатнинг бирлашган энергия тизимига 3 ноябрь куни уланган. Энергия тизимига уланганидан бошлаб уч сутка давомида БелАЭСдан 22 миллион киловатт/соат электр энергияси чиқарилган.
Изоҳ (0)