Мухолифат Арманистоннинг Қорабоғ бўйича келишувдаги иштирокини бекор қилмоқчи
«Гуллаб-яшнаётган Арманистон» мухолифатчи партияси Ереваннинг Қорабоғ бўйича келишувлардаги иштирокини бекор қилиш учун навбатдан ташқари парламент мажлисини чақириш нияти ҳақида маълум қилди, деб ёзади «РБК».
«Биз бу қарорни бекор қилиш мақсадида навбатдан ташқари мажлис чақириш учун имзо тўплаяпмиз», — деди депутат Иветта Тоноян. Айни вақтда Арманистон парламентининг яна бир аъзоси Наира Зограбян Ереваннинг Қорабоғ бўйича келишувдаги иштирокини бекор қилиш имконияти борлигига шубҳа қилишини айтди.
«Sputnik Арманистон» ёзишича, «Гуллаб-яшнаётган Арманистон», «Дашнаксутюн» АРФ ва «Ватан» партиялари етакчилари Арманистон ҚК иош штаби раҳбари Оник Гаспарян билан учрашиб, мамлакатдаги вазиятни муҳокама қилган. Партиялар мамлакат қуролли кучларини ва Қорабоғ мудофаа армиясини қўллаб-қувватлаб, аҳолини тинчлик сақлашга чақирган.
Партиялар етакчилари тез орада ҳамкасблари билан мамлакатдаги вазиятни муҳокама қилиб, унинг ечими борасида таклифлар тақдим этишини маълум қилди.
Эслатиб ўтамиз, Арманистон, Озарбайжон ва Россия етакчилари 9 ноябрь куни кечқурун Қорабоғда жангларни тўхтатиш ҳақида уч томонлама шартнома имзолади. Сулҳ шартлари Келбажар, Агдам, Лачин туманлари ва Газах туманида Арманистон томони эгаллаб турган ҳудудлар Озарбайжон назорати остига берилишини назарда тутади.
Баҳсли ҳудудга 2 мингга яқин Россия тинчликпарварлари киритилади, улар ўт очишни тўхтатиш режимига риоя қилинишини назорат қилади. Шунингдек, томонлар асирлар, марҳумларнинг жасадларини айирбошлашни бошлайди ва минтақада транспорт қатновини қайта тиклайди.
Сулҳ шартларидан, хусусан, Озарбайжонга баҳсли ҳудудларнинг бир қисми берилишидан норози бўлган намойишчилар республика ҳукумати биносига бостириб кирди. Улар Пашинян уларга топширилишини талаб қилди, ҳукуматга қарши шиорларни бақириб айтди. Шунингдек, Миллий мажлис спикери Арарат Мирзоян дўппосланди. Намойишчилар спикер ўтирган машинани ўраб олиб, Мирзоянни ундан чиқариб олган ва дўппослаган. Арманистон пойтахти марказида жами бир неча минг киши тўпланди.
Кейинроқ Пашинян ўз Facebook’ида жонли эфирга чиқиб, унинг тинчлик шартномасини имзолашдан бошқа чораси бўлмаганини айтди. Тафсилотлар ҳақида яқин кунларда маълумот беришни ваъда қилди. Шунингдек, у Еревандаги тартибсизликлар иштирокчилари жавобгарликка тортилишини айтди.
