Қашқадарёда ўрмон ёнғини юз берди. Салкам 600 та Зарафшон арчаси ёниб кетган

Қашқадарё вилоятида Қамаши тумани ҳудудида жойлашган ўрмон хўжалигида ёнғин кузатилди. Вилоят Экология ва атроф муҳитни муҳофаза қилиш бошқармаси ахборот хизмати раҳбари Карима Ёдгорованинг «Дарё»га маълум қилишича, ҳодиса 3 ноябрь куни юз берган.

5 гектар майдонни қамраб олган ёнғин оқибатида ўрмон хўжалиги ҳудудидаги ноёб дарахтлар, ўсимлик ва ҳайвонот дунёсига талофат етгани таъкидланмоқда. Хусусан, тахминан 600 га яқин Зарафшон арчаси ёниб кетган. «Айни пайтда зарар миқдори аниқланмоқда», -- деди Карим Ёдгорова.

Алоҳида қайд этишларича, ёнғин оқибатида аҳоли орасида жабрланганлар йўқ. Бошқарма ёнғин юзасидан яқин вақт ичида қўшимча ахборот бериши кутилмоқда.

Аввалроқ, 12 сентябрь куни Сурхондарё вилояти Шеробод туманидаги «Қизириқ» ўрмон хўжалигида 50 гектар майдонда, 26 июлда Самарқанд вилоятидаги «Зарафшон» табиат миллий боғида 2 минг квадрат метр майдонда, 17 июнь куни Сурхондарёдаги «Сурхон» давлат қўриқхонасида 35 гектар майдонда ёнғинлар кузатилгани ҳақида хабар берилган эди. Қайд этиш жоиз, «Сурхон» қўриқхонасидаги ёнғинни ўчиришга ҳарбий вертолётлар ҳам жалб этилган эди.