АҚШнинг Вермонт штатида яшовчи Дениз МакКарти Жанубий Кореядан бўлиб, 1976 йил у икки ёшга тўлганида америкалик оила томонидан асраб олинган. Фарзанд асраб олиш агентлиги қизнинг касаллиги туфайли касалхонага ташлаб кетилганлигини маълум қилган, дея хабар беради WCАХ.
Дениз ўтган йиллар мобайнида бахтли ҳаёт кечирди, лекин у ҳар доим ўзида нимадир етишмаётганини ҳис қилар эди. 2016 йил Дениз Жанубий Кореяга бориб, у ерда бошқа мамлакатларга асраб олишга берилган болалар қариндошларини топишга ёрдам берадиган ташкилот дастури доирасида ДНК тестини топширди. Маълум бўлишича, Денизнинг онаси ҳам бир йил ўтиб тест топширган, аммо ҳаммасига аниқлик киргунча ҳам уч йил вақт ўтган.
2020 йилнинг октябрь ойи бошларида Денизга Жанубий Кореядан қўнғироқ бўлди ва унинг оиласи топилганлиги ҳақида маълумот берилди. 14 октябрда Дениз видеоқўнғироқ орқали илк бора онаси, катта акаси ва ўзига икки томчи сувдек ўхшаш эгизак синглисини кўрди. Афсуски, унинг отаси ва бувисига бу каби бахтли дақиқаларни кўриш насиб этмади.
Маълум бўлишича, Денизни 44 йил аввал ҳеч ким шифохонага ташлаб кетмаган ва ўтган йиллар мобайнида улар йўқолган қизини излашни тўхтатмаган. Ҳамиша унинг қайтиб келишига умид қилишган.
Хабарга кўра, аслида исми Сан-Айе бўлган Дениз 1976 йил июнь ойида Сеулда бувиси ва синглиси Сан-Хи билан улкан бозорида ғойиб бўлган. Бир сонияга қўйиб юборилган қўл туфайли эгизак қизлар оломон ичида йўқолган. Сан-Хи уч кундан кейин топилиб, уйга қайтарилди. Аммо Сан-Айе эса ҳеч қаердан топилмади. Бир неча ойдан сўнг эса йўқолган қиз – Сан-Айе МакКарти оиласи томонидан асраб олинган.
«Биз сени ҳеч қачон унутмадик ва сенинг қайтишингга умид қилар эдик», − дейди Денизнинг онаси ва синглиси.
Онасининг сўзларига кўра, 44 йил мобайнида улар ҳеч қаерга кўчиб кетмаган ва бозорда ҳам ўз дўконида савдо қилган. Бир кун келиб қиз қайтадиган бўлса, албатта, уни танишга ишонган».
«Ҳаётимнинг илгари йўқолган қисмини тиклаш учун бу шунчаки ақл бовар қилмайдиган мукофот, энди мен ниҳоят ўзимни яхши ҳис қиляпман», − дейди Дениз. − Энг асосийси, эгизак синглим борлигини билиш эди. У билан овозимиз, ташқи кўринишимиз ҳам бир хил. Биз ҳатто бир хил ранг ва таомларни яхши кўрамиз. Шунингдек, иккаламиз ҳам саёҳат қилишни ёқтирамиз».
Энди Дениз умрининг қолган қисмини ўзининг ҳақиқий оиласи билан ўтказишга ҳаракат қилмоқда. У пандемиядан сўнг ўзининг оиласига қайтиш, улар билан танишиш учун Жанубий Кореяга саёҳат қилиш ва она тилини яхши ўрганишни режалаштирмоқда. Ҳозирча у оиласи билан таржимон иловаси орқали мулоқотларни олиб бормоқда. «Энди менинг катта оилам бор, биз бир-биримизни яхши кўрамиз. Мен ҳеч қачон ўзимни ҳозиргидек бахтли ҳис этмаганман. Бундан ортиқ бахт бўлмаса керак», − дейди Дениз.
Мавзуга доир:
Изоҳ (0)