O‘zbekiston bolalar mehnatiga barham berish bo‘yicha o‘rtacha taraqqiyotga erishdi — AQSh Mehnat vazirligi

AQSh Mehnat vazirligi bolalar mehnatining eng yomon shakli bo‘yicha yillik xulosalarining 19-nashrini e’lon qildi (TDA hisoboti), deb xabar bermoqda “Gazeta.uz”. Unda bolalar mehnatiga qarshi kurashish bo‘yicha 131 ta davlat va hududlarning sa’y-harakatlari belgilanib boriladi. Ushbu ko‘rsatkich bo‘yicha mamlakatlarga “salmoqli”, “o‘rtacha”, “minimal” taraqqiyot baholari beriladi yoki “yaxshilanish yo‘q” deb qayd etiladi.

Hisobotda aytilishicha, 2019-yilda O‘zbekistonda bolalar mehnatining eng yomon shakllariga barham berish bo‘yicha o‘rtacha taraqqiyot kuzatilgan. Hukumat paxta yig‘im-terimi davrida bolalar mehnatidan foydalanishning oldini olish choralarini ko‘rgan. Shu jumladan, og‘ir sharoitlarda mehnat qilish taqiqini takroran buzganlarga nisbatan jinoiy javobgarlik belgilangan, mehnat inspektorlari soni ikki baravar oshirilgan, bolalar mehnatini taqiqlovchi va ularni buzganlik uchun javobgarlik to‘g‘risida qonunlar bo‘yicha jamoatchilik xabardorligini yuzasidan keng ko‘lamli ishlar amalga oshirilgan.

Bundan tashqari, hukumat tomonidan Odam savdosiga va majburiy mehnatga qarshi kurashish milliy komissiyasi tashkil etildi va majburiy mehnatga qarshi kurashish bo‘yicha yangi harakatlar rejasini qabul qildi.

“Shunga qaramay, O‘zbekistonda bolalar mehnatining eng yomon shakllari qo‘llaniladi, shu jumladan, bolalarni tijoriy maqsadda jinsiy ekspluatatsiya qilish. Hukumat bolalar majburiy mehnatiga qarshi kurashning barcha sohalarida birlashgan sa’y-harakatlarni amalga oshirgan bo‘lsa-da, bolalarni tijorat yo‘lida jinsiy ekspluatatsiya qilishni taqiqlovchi qonun-qoidalar xalqaro standartlarga muvofiq kelmaydi”, — deyiladi hisobotda.