2020 йил 1 ноябрдан бошлаб хўжалик юритувчи субъектлар, жумладан ресторан ва кафелар учун табиий газни етказиб бериш чеклаб қўйилмоқда. Энергетика вазирлиги ушбу ҳаракат зарурий чора эканини билдирган ва яқин келажакда куз-қиш мавсумида газ ўрнини босувчи ёқилғи воситаларидан фойдаланишга ўтилишини қайд этган.
Фото: Энергетика вазирлиги ахборот хизмати
Аввал Тошкентдаги тадбиркорлар газ таъминоти органи ходимларидан 1 ноябрдан бошлаб газ узатилиши ўчириб қўйилиши тўғрисида огоҳлантириш олаётгани хабар қилинган. Бу ҳақда пойтахтдаги бир нечта ресторанлар асосчиси (Белле Маман, «Свидалная» ва ҳоказо) Артур Рудомёткин ўзининг Facebook’даги саҳифаси орқали маълум қилган. У энергетика вазири Алишер Султоновнинг 26 октябрдаги 143-сонли буйруғи сурати билан бўлишган.
«Афтидан, бу тадбиркорлар учун шундай оғир кунда бизнесни қутқаришнинг яна бир чораси бўлса керак. Бу нимани англатади? Узоқ давом этган карантиндан сўнг умумий овқатланиш масканлари сектори ҳозирнинг ўзида барча нуқталарини электр токига мослаштиришни маблағларни қаердан олишни ўйламасдан бошлаши лозимлигини билдиради», — дея изоҳ қолдирган Рудомёткин.
Шунингдек, унинг таъкидлашича, тадбиркорлар фақат электр токида ишлайдиган янги ошхона технологиялари — плиталар, шкаф ва печларни сотиб олиши керак. Бундан ташқари, уч фазали электр қурилмалари ишлаши учун барча электр қувватини ошириш бўйича лойиҳаларнинг ҳаммасини ўзгартиш зарур.
Энергетика вазирлиги табиий газдан фойдаланишга қўйилаётган чекловларни зарурий чора деб атаган. Вазирлик ахборот хизмати куз-қиш мавсумида аҳоли ва ижтимоий соҳа объектларига табиий газ етказиб беришга асосий ўрин берилишини билдирган.
«Газ таъминоти қувватларини ошириш мақсадида газ таъминоти корхоналари томонидан мавжуд газ таъминоти инфратузилмасини модернизация қилиш бўйича фаол иш олиб борилаётганини, бу эса ҳозирги вақтда истеъмолни ошириш пайтида табиий газни тенг тақсимлаш имкониятига эга эмаслигини маълум қиламиз. Шу муносабат билан, табиий газ тақсимотини мувозанатлаштириш бўйича махсус вақтинчалик чоралар кўрилмоқда. Бу эса, уйлар, хонадонлар, мактаблар, болалар боғчалари ва шифохоналарни табиий газ билан барқарор таъминлаш имконини беради», — дейилади вазирлик хабарида.
Энергетика вазирлигининг хабарида жорий этилган муқобил ёқилғи манбаларига ўтишнинг давлат дастурига мувофиқ, ижтимоий аҳамиятга эга бўлмаган юридик истеъмолчилар 2020-2021 йиллар куз-қиш даври бошланиши арафасида тегишли билдиришномаларни олгани қайд этилган.
«Шу кунларда Тошкентнинг юқори босимли газ қувурларига уланган йирик улгуржи истеъмолчилар «Ҳудудгазтаъминот» АЖдан аҳоли ва ижтимоий соҳа объектларига газ етказиб бериш барқарорлигига таъсир кўрсатмаслик учун уларни «саноат коллектори»га ўтказиш тўғрисида хабарнома олдилар. Барча корхоналар жорий йил бошида «саноат коллектори»га ўтказиш зарурлиги тўғрисида хабарнома олган.
Тошкент шаҳрининг мавсумий истеъмолчиларига (ғишт, гипс оҳак ва бошқа ижтимоий аҳамиятга эга бўлмаган йирик саноат корхоналари) табиий газ етказиб бериш 1 ноябрдан тўхтатилиши тўғрисида хабар берилди.
Шундай қилиб, куз-қиш даврида табиий газ етказиб берилиши кафолатланмаган улгуржи истеъмолчилар, шу жумладан умумий овқатланиш корхоналари муқобил ёқилғидан фойдаланишга ўтиш учун фаол чоралар кўришлари керак. Олдинда йилнинг совуқ мавсуми турибди, шунинг учун табиий газ таъминоти узилишларсиз ва керакли ҳажмда, биринчи навбатда, аҳоли хонадонлар, шифохоналар ва таълим муассасаларига етказиб берилиши керак», — дейилган хабарда.
