Қрим соғлиқни сақлаш вазири касалхонага бориб, COVID-19 беморларини даволашга қарор қилди

Қрим соғлиқни сақлаш вазири Александр Остапенко Симферополдаги COVID-19 беморлари даволанадиган касалхонага бориб ишлашга қарор қилди. «РБК»нинг хабар беришича, бу ҳақда у коронавируснинг олдини олиш бўйича штаб йиғилишида маълум қилган.

«Мен, Сергей Валеревич, республикамизнинг тиббиёт ходимларидан иборат 40 минг кишилик жамоамизнинг оддий аъзоси, давлат хизматчиси мақомини инобатга олган ҳолда коронавирус госпитали — 7-шаҳар касалхонасига бориб ишлашга ихтиёрий равишда қарор қилдим», — деган Остапенко.

Унинг таъкидлашича, Қримда пневмония билан оғриган беморларни даволаш учун тиббиёт ходимлари етишмаяпти. Вазир касалхонадаги ишини соғлиқни сақлаш вазири вазифалари билан биргаликда олиб боради.

Александр Остапенко 2020 йилнинг сентябрь ойида вазир этиб тайинлангунга қадар Қримдаги Семашко номидаги Республика клиник касалхонасининг бош шифокори бўлган. У 2019 йилдан буён соғлиқни сақлаш вазири бўлиб келган Игор Чемодановнинг ўрнини эгаллаган.

Сентябрь ойи охирида Қрим раҳбари Сергей Аксенов беморларни касалхонага ётқизишдан бош тортиш билан боғлиқ кўплаб шикоятлар туфайли Соғлиқни сақлаш вазирлиги ишини танқид қилган. У, шунингдек, Қрим Соғлиқни сақлаш вазирлигида шифокорлар касалхонага ётқизишни рад этган пневмония билан касалланган икки беморнинг ўлими юзасидан ички текширув ўтказилишини айтган. Кейинчалик Аксенов Чемодановни лавозимидан четлатган.