2019 йилда Таиландда бўлиб ўтган парламент сайловларидан кейин Конституциявий суд мамлакатнинг асосий мухолифат кучи — Келажак партияси фаолиятини тақиқлаб қўйган эди. Уни асосан ёшлар қўллаб-қувватлагани сабабли 2020 йил бошида талабалар кампусларида маҳаллий норозилик акциялари ташкил қилинди, аммо коронавирус пандемияси бошлангач улар тинчиб кетди, деб ёзади Meduza.
Ёзда коронавирус чекловларининг кўпчилиги бекор қилингач норозилик намойишлари энди янада кенгроқ кўламда қайта тикланди — уларга Таиланд мухолифат фаоли Камбоджада ўғирлаб кетилиши расмий сабаб бўлиб хизмат қилди. Ўғирлаб кетишни Таиланд ҳукумати уюштирган бўлиши мумкинлиги тахмин қилинди.
18 июль куни Бангкокда давлат тўнтаришидан кейинги энг катта кўламли митинг бўлиб ўтди, унинг иштирокчилари конституция ўзгартирилишини, ҳукумат истеъфосини ва янги парламент сайловларини талаб қилди. Кейинроқ монархия институти ислоҳ этилиши ҳақидаги талаб ҳам қўшилди.
Кейинги уч ой давомида акциялар янада мунтазам тус олди: ҳар уч-тўрт ҳафтада бир марта энг катта намойишлар бўлиб ўтар, уларда бир неча ўн минглаб киши қатнашар эди. Ҳукумат вазирлар маҳкамаси истеъфоси ҳақидаги талабни эътиборсиз қолдирган бўлса-да, конституция ислоҳоти таклифи парламентда муҳокама қилина бошлади.
14 октябрь куни Бангкокда бир ой ичидаги энг йирик намойиш бўлиб ўтди. Бу сафар ҳукумат жавоб тариқасида коронавирус пандемияси бошидан буён амал қилаётган фавқулодда вазият режимини кучайтиришга қарор қилди: беш кишидан ортиқ одамнинг тўпланиши тақиқланди. Эртаси куни полициячилар сувотар қуроллар билан намойишларни тарқата бошлади.
Аммо бу чоралар намойишчиларни тўхтатмади: акциялар ҳар куни ва янада кўпроқ одам иштирокида, шунингдек, нафақат Бангкокда, балки бошқа шаҳарларда ҳам ўтказила бошлади.
22 октябрь куни ҳукумат ён босди. Фавқулодда вазият режими юмшатилди. Бош вазир Прают Чан-Оча намойишчиларни муросага чақириб, низони тартибга солиш учун навбатдан ташқари парламент сессиясини чақирди. Парламентдаги муҳокамалар 26—27 октябрь кунлари бўлиб ўтди. 28 октябрь куни вазирлар кенгаши кейинги қадамлар ҳақида эълон қилиши кутилмоқда.
Шуниси эътиборга лойиқки, намойишчилар қиролни очиқдан очиқ танқид қилмоқда. Бунинг учун 15 йилга қамалиш мумкинлиги ҳам уларни тўхтатмаяпти. Уларнинг норозилигига Таиландда коронавирус туфайли локдаун эълон қилинган бир пайтда қиролнинг бир неча ойлардан буён Германияда маъшуқалари билан вақт ўтказаётгани ҳам сабаб бўлган.
26 октябрь куни акция иштирокчилари Германиянинг Бангкокдаги элчихонаси ёнидан марш билан ўтиб, дипломатларга Маха Вачиралонгкорн ўз отаси меросининг Германиядаги қисмини олгандан кейин солиқ тўлаган-тўламаганлиги ҳамда Германияда пайтида сиёсат билан шуғулланган-шуғулланмаганлигини аниқлаштириш илтимоси битилган петицияни топширди. Германия ташқи ишлар вазири бу қоида бузилгани аниқланса, зудлик билан чора кўрилишини айтиб таҳдид қилди. Қирол эса Таиландга октябрь бошида қайтиб келди.
Изоҳ (0)