«Ангрен шакар» ва «Хоразм шакар» масъулияти чекланган жамиятлари шу кунларда оммавий равишда ходимларини ишдан бўшатишни бошлади. Бу ҳақда «Ангрен шакар» МЧЖ матбуот хизматига таяниб, ЎзА хабар берди.
Маълумотларга кўра, айни пайтгача 130 нафардан зиёд ходим ишдан бўшатилган.
Уларнинг маълум қилишича, «Ангрен шакар» ва «Хоразм шакар» заводлари йил охирига қадар деярли барча ишчиларни ишдан бўшатишни мўлжаллаган.
Маълум қилинишича, ҳозирда иккита заводда жами 2000 нафардан зиёд ишчи ходимнинг даромадсиз қолиш хавфи туғилмоқда.
Эслатиб ўтамиз, шу йилнинг июль ўрталарида Ўзбекистоннинг иккита энг йирик шакар заводи — «Ангрен шакар» ва «Хоразм шакар» хом ашё етишмовчилиги сабабли ишлаб чиқаришни тўхтатиб қўйганди. «Gazeta.uz» маҳаллий ишлаб чиқарувчилар импорт қилувчилар билан рақобат сабабли қийинчиликларга дуч келаётганини ёзганди.
«Ангрен шакар» бош директори Рустам Акбархўжаев ва «Хоразм шакар» бош директори Умиджон Комиловнинг қўшма баёнотида эса янги хом ашё партияси келгунга қадар ускуналарни профилактик тозалаш ишлари олиб борилаётганини таъкидлаганди.
Маълумот учун, «Ангрен шакар» кунига 1000 тонна шакар ишлаб чиқариш қувватига эга, аммо яқин вақтгача ишлаб чиқариш ҳажми 500-600 тоннани ташкил этган ҳамда савдо бир неча тоннагача тушган.
Изоҳ (0)