Фарғона вилоятида велосипедчилар иштирокидаги ЙТҲлар кўпайгани туфайли велосипедлар ҳам жарима майдонига жойлаштирилмоқда

Фарғона вилоятида 2020 йилнинг ўтган тўққиз ойи давомида содир бўлган 635 та ЙТҲда 150 нафар фуқаро ҳалок бўлган. Ушбу ЙТҲларнинг 29 фоизи велосипедчилар иштирокида содир этилган. Бу ҳақда «Дарё»га вилоят ИИБ ахборот хизмати хабар берди.

Қайд этилишича, 2020 йилнинг тўққиз ойи давомида велосипедчилар иштирокида 186 та йўл-транспорт ҳодисаси содир этилиб, ушбу ҳодисаларда 38 нафар фуқаро ҳалок бўлган, 155 нафар фуқаро турли даражада тан жароҳати олган.

Шу сабабдан вилоят Йўл ҳаракати хавфсизлиги бошқармаси ходимлари томонидан олиб борилаётган тарғибот-ташвиқот тадбирларида мототранспорт ва велосипедчиларга алоҳида эътибор қаратилмоқда. Улар билан профилактик суҳбатлар ўтказилиб, мототранспорт ҳайдовчиларига мотошлемлар ҳамда велосипедчиларга тунги вақтларда нур қайтарувчи нимчалар, велосипедларга эса нур қайтарувчи жиҳозлар тарқатилмоқда.

Огоҳлантиришларга қарамасдан сутканинг қоронғи вақтларида ёритиш чироқларисиз, нур қайтарувчи воситалар билан жиҳозланмаган, шунингдек, маст ҳолда велосипед бошқарган фуқароларни аниқлаш тадбирлари ўтказилмоқда.

Жумладан, 2020 йилнинг 20 октябридан 22 октябрь кунига қадар 489 та велосипед аниқланган камчиликларни бартараф этиш мақсадида вақтинчалик жарима майдонига олиб кирилган. 13 нафар фуқарога эса маст ҳолда велосипедда ҳаракатлангани учун тегишли тартибда чора кўрилган.

Эслатиб ўтамиз, аввалроқ Ички ишлар вазирлиги Йўл ҳаракати хавфсизлиги бош бошқармаси Ўзбекистонда 2020 йилнинг 8 ойида велосипедлар иштирокида юз берган ЙТҲларда 143 киши ҳалок бўлганини маълум қилганди.