Toshkent shahar IIBB Yo‘l harakati xavfsizligi boshqarmasi xorijiy tajribaga asoslanib, yangi – “YTH sodir bo‘lishi ehtimoli yuqori bo‘lgan yo‘l qismi” yo‘l belgisini joriy etish maqsadga muvofiqligini o‘rganmoqda.

Foto: “Daryo”

“Mazkur yo‘l belgisi haydovchi va piyodalarni yo‘l-transport hodisalari ehtimoli yuqori bo‘lgan yo‘l qismiga yaqinlashib kelayotganlari haqida ogohlantiradi. Ma’lum yo‘l qismining xavfliligi statistik ma’lumotlar va mavjud sharoitlarni (yo‘l qoplamasi, ko‘rinishni to‘suvchi yo‘l chetidagi daraxtlar, bino va inshootlar va boshqalar) inobatga olgan holda baholanadi. Xususan, yo‘l-transport hodisalari ro‘y berishi ehtimoli yuqori bo‘lgan yo‘l qismlariga o‘tgan chorak davomida uch martadan ko‘p YTH ro‘y bergan hududlar kiritiladi.

Yangi ogohlantirish chetlari qizil rang bilan chegaralangan va o‘rtasida qora rangli nuqtasi bo‘lgan oq rangdagi uchburchak belgi ko‘rinishida bo‘lishi kutilmoqda. Uning ostida to‘rtburchak shaklda ikki avtomobilning to‘qnashuvi yoki avtomobil va piyoda ishtirokida YTH aks etgan rasmli izoh berilgan belgi ham o‘rnatiladi.

Belgi xavfli hududdan 100-150 metr oldin o‘rnatilib, natijada yo‘l harakati qatnashchilarida chora ko‘rishlari uchun vaqt bo‘ladi. Haydovchi tezlikni pasaytirishi, harakatlarni ehtiyotlik bilan amalga oshirishi zarur . Piyodadan esa yo‘lni ehtiyot bo‘lib kesib o‘tishi talab etiladi”, – deyiladi boshqarma axborotida.

Foto: Toshkent shahar IIBB

Shuningdek, Toshkent shahar IIBB belgining ta’siriga baho berish uchun sinov tariqasida mazkur belgilarni o‘rnatish rejalashtirilgani, ushbu chora yo‘l-transport hodisalarining oldini olishda samarali bo‘lish yoki bo‘lmasligi yuzasidan haydovchi va piyodalarga izohlar qoldirishni taklif etgan.

Eslatib o‘tamiz, O‘zbekistonda 2020-yilning to‘qqiz oyi davomida sodir bo‘lgan YTHlar oqibatida qariyb 1300 kishi halok bo‘lgan.

O‘zbekistonda 2020-yil yanvar oyidan sentabr oyigacha 4294 ta yo‘l-transport hodisasi sodir bo‘lgan. YTHlarning 1919 tasi piyodalar, 728 tasi bolalar, 579 tasi velosipedchilar, 77 tasi mototsiklchilar, 146 tasi taksi haydovchilari bilan sodir bo‘lgan. 17,8 foiz holatda avariyalar piyodalarning ko‘chani noto‘g‘ri joyidan kesib o‘tishi oqibatida yuz bergan.