Қирғизистонда муддатидан олдинги президентлик сайловлари 2021 йилнинг 10 январь куни бўлиб ўтади. Бу ҳақда Марказий сайлов комиссияси қарорига таяниб, «24.kg» хабар берди.
Марказий сайлов комиссияси раиси Нуржан Шайлдабекованинг таъкидлашича, қонун бўйича агарда Юқори Кенгаш давлат раҳбари ваколатлари тугаганидан кейин бир ҳафта ичида муддатидан олдинги президентлик сайловларини ўтказиш санаси белгиламаса, ушбу муддатнинг эртаси куни расмий белгиланган кун ҳисобланади.
«Шундан сўнг сайлов комиссияси икки кун ичида сайловларни ўтказилиш санасини расман эълон қилади. Қонунчиликка кўра, у давлат раҳбари ваколатлари тугатилганидан кейинги уч ой ичида ўтказилиши керак — 2021 йил 16 январга қадар», — дейди МСК раиси.
Нуржан Шайлдабекованинг қўшимча қилишича, сайловлар одатда дам олиш кунлари ўтказилгани сабаб ушбу санани 10 январга кўчириш таклиф этилмоқда. Марказий сайлов комиссияси аъзолари ушбу таклифни қўллаб-қувватлаган.
Аввалроқ Қирғизистон парламенти президентлик сайловлари ўтказиладиган санани белгилай олмагани тўғрисида хабар берилганди.
Эслатиб ўтамиз, 15 октябрь куни Сўронбай Жээнбеков Қирғизистон президентлиги лавозимидан истеъфо берганини эълон қилди. У бош вазир Садир Жапаров ва бошқа сиёсатчилардан ўз тарафдорларини пойтахтдан олиб чиқиб кетишни сўраган ва улардан бишкекликлар тинчлигини бузмасликни илтимос қилган. 16 октябрь куни парламент мажлисида Қонунчилик кенгаши спикери Канат Исаев давлат раҳбарининг вазифаларини вақтинча бажаришни рад этган. Якунда бош вазир Садир Жапаров президент вазифасини бажарувчига айланди.
Изоҳ (0)