Польшада жиддий нуқсони бўлса ҳам ҳомилани олдириш тақиқланди. Бунга қарши юзлаб аҳоли норозилик билдириб чиқиш қилди

Польша Конституциявий суди ҳомилада жиддий нуқсон ва бедаво дард аниқланса, ҳомилани олдириш имкониятини бекор қилди, деб хабар бермоқда Meduza. Мамлакатдаги қонуний абортларнинг 98 фоизи шу сабабли амалга ошириларди.

Polskie Radio’да қайд этилишича, Польша Конституциявий суди бундай имкониятни берган 1993 йилги қонундаги моддани конституцияга зид деб топган.

Associated Press’нинг ёзишича, Конституциявий суднинг 11 нафар судьяси бу қарорни қўллаб-қувватлаган, икки нафари қарши чиққан. Суд Сейм (Польша бир палатали парламенти)нинг тўртта, шу жумладан, «Ҳуқуқ ва адолат» ҳукмрон консерватив партиясидан бўлган 100 дан ортиқ депутатнинг мурожаатини қаноатлантирган.

Суд ўз қарорини эълон қилганидан бир неча соат ўтиб, юзлаб одамлар коронавирусга қарши чекловларни бузган ҳолда Конституциявий судга қарши норозилик намойишига чиққан, сўнг «Ҳуқуқ ва адолат» партияси идорасига борган. Партия аёлларни қўллаб-қувватлаш учун янги қонун тайёрланишини билдирган.

Польшада ҳомилани олдириш бўйича Европадаги энг қатъий қонунлар амал қилади. BBC News’нинг ёзишича, ҳомиланинг тузалмас касаллик туфайли олиниши мамлакатда аборт қилишнинг деярли бутунлай тақиқланганини билдиради.

2019 йилда Польшада мингга яқин қонуний аборт ўтказилган. Ҳуқуқ ҳимоячиларининг баҳолашича, ҳар йили польшалик аёлларнинг 80 мингдан 120 минг нафари ҳомиласини бошқа давлатда олдириб келишга ҳаракат қилади.