Тошкент шаҳрида ҳаракатланадиган жамоат транспорти автобусларининг йўловчилари учун бир кунда 16,8 миллион сўмлик қўлқоплар харид қилинмоқда. Бу ҳақда «Тошшаҳартрансхизмат» акциядорлик жамияти ахборот хизмати маълум қилди.
Тошкент шаҳар жамоат транспортида йўловчиларнинг қўлқоп кийиши мажбурий этиб белгиланганидан кейин «Kun.uz» нашри Тошкент шаҳар Транспорт бошқармаси маълумотларига таяниб, Тошкентда метро ва автобус йўловчилари учун кунига ўртача 28 миллион сўмлик қўлқоп харид қилинаётгани ҳақида мақола эълон қилган.
Компания томонидан маълум қилинишича, жамоат транспортида йўловчиларни бепул қўлқоплар билан таъминлаш мақсадида «Тошшаҳартрансхизмат» акциядорлик жамияти «Poliplast Dizayn» МЧЖ ҳамда «Biznes Tech Mir» МЧЖ корхоналари билан бир марталик қўлқопларни харид қилиш бўйича музокаралар олиб борди.
Музокаралар натижасига кўра, «Poliplast Dizayn» МЧЖ бир жуфт қўлқопни 56 сўмдан. «Biznes Tech Mir» МЧЖ эса бир жуфт қўлқопни 70 сўмдан тақдим этиши маълум бўлди.
«Тошшаҳартрансхизмат» юқоридаги икки корхонадан энг маъқули «Poliplast Dizayn» МЧЖ деб топиб, шартнома имзолаган.
Маълум қилинишича, ҳозирги вақтда «Тошшаҳартрансхизмат» автобусларига бир кунда 300 минг дона бир марталик қўлқоплар тарқатилмоқда. Бунинг учун компания бир кунда 16 800 000 минг сўмлик қўлқопларни «Poliplast Dizayn» МЧЖ корхонасидан харид қилмоқда.
Шунингдек, «Тошшаҳартрансхизмат» АЖ бир марталик қўлқопларнинг кунлик ҳажмини янада кўпайтириш мақсадида полиэтиленли бир марталик қўлқоплар ишлаб чиқарувчи тадбиркор ва ишбилармонларни қулай таклифлар бўйича ҳамкорликка чақирган.
Аввалроқ Тошкент шаҳар транспорт бошқармаси бошлиғи Анвар Жўраев жамоат транспортида йўловчиларга тарқатиладиган ҳар бир қўлқоп 56 сўмдан сотиб олинаётгани ва бунинг учун кетадиган харажатлар давлат томонидан қоплаб берилишини маълум қилганди.
Эслатиб ўтамиз, турли юқумли мавсумий инфекциялар тарқалишининг олдини олиш ва йўловчилар саломатлигини асраш мақсадида 19 октябрдан бошлаб Тошкент шаҳар жамоат транспорти (автобус, метро, йўналишли такси) хизматидан фойдаланганда йўловчиларнинг тиббий ниқоб ва қўлқопда бўлиш тартиби жорий этилди ва қўлқоплар йўловчиларга бепул тарқатиладиган бўлди.
Изоҳ (0)