Навоийда 4 млрд сўмга қурилган болалар боғчаси 8 ой ўтиб таъмирталаб аҳволга келди

Навоий вилоятининг Конимех туманидаги 2-сонли «Олтин калит» мактабгача таълим ташкилоти шу йилнинг февраль ойида тантанали равишда фойдаланишга топширилган эди. Боғча қурилиши учун 4 миллиард сўм сарфланган. Шунга қарамасдан, ҳозирда муассаса таъмирталаб аҳволга келиб қолган. «Gazeta.uz»нинг ёзишича, бу ҳақда «Ўзбекистон 24» телеканалининг «Факт 24» кўрсатувида маълум қилинди.

«Март ойининг иккинчи ярмида барча таълим ташкилотлари карантин сабаб ёпилган бўлса, янги боғча қанча муддат фаолият юритдики таъмирга муҳтож бўлса, яхшиямки ҳали ёғин-сочинли кунлар келмади. Хўш, бунга сабаб нима? Давлат томонидан ажратилган маблағ манзилга етиб бормадими? Сифатли лойиҳа қоғозда қолиб, унга ажратилган миллиардлар қаёққа кетди?» — дейилади кўрсатувда.

Видеодан кўриш мумкинки, бинонинг ички девори ва шифтида ёриқлар пайдо бўлган, бунга эса қурилиш вақтида ғиштларнинг нотўғри терилгани сабаб қилиб кўрсатилади. Конимех тумани мактабгача таълим бўлими бошлиғи Хонимгул Норбоева эса интервью давомида: «Юқори ташкилотимизга хат билан чиқдик. Бўлимимиз қурилиш фирмаларига чиқиб, маслаҳатлашиб, бузиб, деворни қайтадан тиклаш ишлари бошланиб кетди», — дея қайд этади.

Шунингдек, кўрсатувда Конимехда ҳар куни бир бино қурилиб, раҳбарларнинг бош қашишга вақти етмайдиган даражада бунёдкорлик бўлмаётгани, маҳаллий ҳокимлик вакиллари масъулиятсизлиги, янги бино шу аҳволда қурилиб, буни ҳеч ким назоратга олмаслигига эътибор қаратилади.

Маълумот ўрнида, республикада сўнгги 4 йил ичида мактабгача таълим ташкилотлари сони 3 баробарга ошиб, 5200 тадан 14200 тага етди. Болаларни қамраб олиш эса 54 фоизга етказилган. Давлат хусусий шериклик механизми жорий этилиши натижасида 223 мингдан ортиқ ўринга эга бўлган 7400 та хусусий боғча ташкил қилинди.

Аввалроқ Тошкентнинг Анҳор канали устидаги пиёдалар кўприги устунлари емирилаётгани тасвирланган суратлар тарқалган ҳолат юзасидан «Ўзбекистон темир йўллари» изоҳ берганди. Ундан аввал Чирчиқ дарёси устига қурилган кўприк яроқсиз ҳолга келаётгани тасвирланган видео юзасидан ҳолат воқеа жойига бориб, мутахассислар иштирокида ўрганилганди. Экспертларнинг хулосасига кўра, кўприк атрофдаги шағал қазувчилар сабаб яроқсиз ҳолга келиб қолган.

Шу йилнинг сентябрь охирларида эса Сурхондарёнинг Қумқўрғон туманидаги 6,5 миллиард сўмга қуриб битказилган кўприк ҳеч қанча вақт хизмат кўрсатмай қулаб тушгани тўғрисида хабар берилганди. Кейинроқ вилоят ҳокимлиги сифатсиз кўприк қурган қурувчи ишини дастлаб жиноят иши очишни рад этган транспорт прокуратураси ўрганаётганини маълум қилганди.