Пандемия бошидан буён Аргентинада коронавирусга чалинганлар сони 1 миллион 2 минг 662 кишига етди, деб хабар беради «РБК» мамлакат соғлиқни сақлаш вазирлигига таяниб. Сўнгги бир кеча-кундузда мамлакатда касалланиш билан боғлиқ 12 982 та янги ҳолат қайд этилган.
Фото: AP Photo
Жонс Ҳопкинс университети маълумотларига кўра, Аргентина дунёда тасдиқланган касалланиш ҳолатлари 1 миллионтадан ошган бешинчи мамлакат бўлди. Аввалроқ бу маррадан АҚШ, Ҳиндистон, Бразилия ва Россия ўтган.
Сўнгги кеча-кундузда Аргентинада COVID-19’га чалинган 451 киши вафот этди, ўлимларнинг умумий сони 26 716 тани ташкил қилди. Пандемия бошидан буён мамлакатда 803,9 минг киши соғайди.
COVID-19’ни юқтириб олиш бўйича биринчи ҳолат 3 март куни аниқланган, ўшанда Италиядан келган фуқарода касаллик қайд этилган. 7 март куни мамлакатда COVID-19’дан биринчи ўлим кузатилган, ой охирида эса карантин чекловлари жорий этилган.
Аргентинада коронавирусга чалиниш бўйича рекорд кўрсаткич 15 октябрда қайд этилган, ўшанда 17 096 кишида касаллик аниқланган.
Эслатиб ўтамиз, дунё бўйича коронавирусга чалинганлар сони 40 миллион кишидан ошди. Касалланганлар сони бўйича биринчи ўринни АҚШ (8,1 миллион киши), ундан кейинги ўринларни Ҳиндистон (7,5 миллион киши) ва Бразилия (5,2 миллион киши) эгаллаган. Тўртинчи ўринда Россия бўлиб, 1,4 миллион киши COVID-19’га чалингани қайд этилган.
Аввалроқ Норвегияда коронавирус инфекциясининг янги мутацияси аниқлангани хабар берилган эди. Тронхейм шаҳрида коронавирус инфекциясининг янги шакли 16–18 октябрь кунлари тест олинган 8 нафар маҳаллий фуқарода аниқланди. Вируснинг мутацияси қандай хусусиятларга эга экани ҳали номаълум. Бундан ташқари Тронхеймда коронавирус юқтириб олиш хавфи кўпайган: одамлар бир-бирлари билан яқин турмаса ва мулоқот қилмаса ҳам инфекцияни юқтириб олиши мумкин.
