Pandemiya boshidan buyon Argentinada koronavirusga chalinganlar soni 1 million 2 ming 662 kishiga yetdi, deb xabar beradi “RBK” mamlakat sog‘liqni saqlash vazirligiga tayanib. So‘nggi bir kecha-kunduzda mamlakatda kasallanish bilan bog‘liq 12 982 ta yangi holat qayd etilgan.
Jons Hopkins universiteti ma’lumotlariga ko‘ra, Argentina dunyoda tasdiqlangan kasallanish holatlari 1 milliontadan oshgan beshinchi mamlakat bo‘ldi. Avvalroq bu marradan AQSh, Hindiston, Braziliya va Rossiya o‘tgan.
So‘nggi kecha-kunduzda Argentinada COVID-19’ga chalingan 451 kishi vafot etdi, o‘limlarning umumiy soni 26 716 tani tashkil qildi. Pandemiya boshidan buyon mamlakatda 803,9 ming kishi sog‘aydi.
COVID-19’ni yuqtirib olish bo‘yicha birinchi holat 3-mart kuni aniqlangan, o‘shanda Italiyadan kelgan fuqaroda kasallik qayd etilgan. 7-mart kuni mamlakatda COVID-19’dan birinchi o‘lim kuzatilgan, oy oxirida esa karantin cheklovlari joriy etilgan.
Argentinada koronavirusga chalinish bo‘yicha rekord ko‘rsatkich 15-oktabrda qayd etilgan, o‘shanda 17 096 kishida kasallik aniqlangan.
Eslatib o‘tamiz, dunyo bo‘yicha koronavirusga chalinganlar soni 40 million kishidan oshdi. Kasallanganlar soni bo‘yicha birinchi o‘rinni AQSh (8,1 million kishi), undan keyingi o‘rinlarni Hindiston (7,5 million kishi) va Braziliya (5,2 million kishi) egallagan. To‘rtinchi o‘rinda Rossiya bo‘lib, 1,4 million kishi COVID-19’ga chalingani qayd etilgan.
Avvalroq Norvegiyada koronavirus infeksiyasining yangi mutatsiyasi aniqlangani xabar berilgan edi. Tronxeym shahrida koronavirus infeksiyasining yangi shakli 16–18-oktabr kunlari test olingan 8 nafar mahalliy fuqaroda aniqlandi. Virusning mutatsiyasi qanday xususiyatlarga ega ekani hali noma’lum. Bundan tashqari Tronxeymda koronavirus yuqtirib olish xavfi ko‘paygan: odamlar bir-birlari bilan yaqin turmasa va muloqot qilmasa ham infeksiyani yuqtirib olishi mumkin.
Izoh (0)