Ўзбекистон Европадаги энг йирик улгуржи бозор – New Spitalfields Market’га 20 тонна қовун етказиб берди

Британия бозорларида ўзбек қовунлари сотилмоқда. Жами 13 гектар майдонда жойлашган ва нафақат Британия, балки бутун Европада қишлоқ хўжалиги маҳсулотларининг энг йирик улгуржи бозори бўлган New Spitalfields Market бозорига 20 тонна Ўзбекистонда етиштирилган «торпедо» навли қовун етказиб берилди. Бу ҳақда «Дунё» ахборот агентлиги хабар қилди.

«Сўнгги йилларда Европа қитъасидаги турли давлатларда, жумладан, Буюк Британияда Ўзбекистонда етиштирилган қишлоқ хўжалиги маҳсулотларига қизиқиш тобора ортиб бормоқда. Jahon Exim LLC ва британиялик тадбиркорлар ўртасида тузилган шартнома асосида ўзбек қовунининг Буюк Британия бозорига етказиб берила бошланиши бунга мисол бўла олади», – дейилади агентлик хабарида.

«Ўзбекистонда етиштирилган қовунларни биринчи марта Британияга етказиб бериш бошланди. Ўз таъми ва сифати билан машҳур бўлган ўзбек қовунлари британиялик истеъмолчилар томонидан яхши баҳо олади деган умиддамиз. Компаниямиз Британияга етказиб берилаётган маҳсулотлар турини ошириш учун ҳаракат қилмоқда. Жумладан, органик ва қуритилган, шунингдек, музлатилган мева ва сабзавотлар экспортини кенгайтиришни режалаштирмоқда», – деган Jahon Exim Group компанияси директори Жаҳонгир Ғиёсов.

Ўзбекистоннинг Лондондаги элчихонаси кўмаги билан Ўзбекистонда етиштирилган қишлоқ хўжалиги маҳсулотларини Британия бозорига экспорт қилиш ҳажмини ошириш бўйича ишлар давом эттирилмоқда. Жумладан, элчихона ёрдамида Британиянинг атроф-муҳит, озиқ-овқат ва қишлоқ хўжалиги вазирлиги (DEFRA) ва Ўзбекистон Вазирлар Маҳкамаси ҳузуридаги ўсимликлар карантини инспекцияси («Ўздавкарантин») ўртасида музокаралар ўтказилмоқда. 2020 йилнинг август ойида бўлиб ўтган навбатдаги музокаралардан сўнг Британия томони Ўзбекистон Англияни анор, гилос, олхўри, нектарин, ўрик, хурмо, олма, нок, узум, лимон, аччиқ қалампир ва помидор каби маҳсулотлар билан таъминлаш имкониятлари мавжудлигини билдирди ва шу тариқа бу мамлакатга маҳсулотлар экспорти бошланди.

2020 йил сентябрь ойида Лондоннинг Western International Market улгуржи бозорида Ўзбекистонда тайёрланган қуритилган меваларнинг биринчи партияси Самарқанд вилоятидаги Garden Cells корхонаси ва Британиянинг Vita Plus Ltd компанияси ўртасида имзоланган шартнома доирасида сотилган.

Дунё бўйлаб энг кўп етиштириладиган полиз маҳсулотларидан бири қовун ҳисобланади. 2018 йилда дунёнинг турли мамлакатларида 1,2 миллион гектар ерда турли навдаги қовунлар етиштирилган ва ўртача ҳосил гектарига 27 тоннани ташкил этган. Шу йили дунё бўйлаб етиштирилган қовун савдосининг умумий айланмаси 27,4 миллиард долларни ташкил этган. Бундан 1,9 миллиард долларлик, яъни 2,3 миллион тонна қовун экспорт қилинган. Қолган ҳосил қовун етиштирган мамлакатларнинг ички бозорида сотилган.

Дунёда қовун етиштирувчи давлатлар орасида Хитой етакчи ҳисобланади. Мамлакатда 2018 йил 17 миллион тонна қовун етиштирилган. 2-ўринда Туркия (1,8 миллион тонна), 3-ўринда Эрон (1,6 миллион тонна) қайд этилган.

Сентябрда Ўзбекистондан Нидерландияга 60 тонна қовун экспорт қилингани ҳақида хабар берилганди. 2019 йил сентябрь ойидан бошлаб Ўзбекистон Хитойга қовун экспорт қила бошлаган.