«Ўзбекистон темир йўллари» матбуот хизматининг хабар беришича, 16 октябрь куни Тошкент метрополитенининг «Олмазор» станциясидан янги қурилаётган Сергели метро йўналишининг сўнгги – «Қипчоқ» станциясигача тест режимида поезд ўз ҳаракатини амалга оширди.
Қайд этилишича, синов натижасида устки пўлат изларининг тайёрлиги тасдиқланган. Айни пайтда метро йўналишида якуний қурилиш-монтаж ва пардозлаш ишлари олиб борилмоқда.
Янги метро йўналиши ва унинг объектлари қурилиш меъёрлари ва техник талабларига мос равишда, белгиланган муддатларда 2020 йил охирига қадар фойдаланишга топширилиши режалаштирилган.
Сергели метро йўналишида қурилиш ишлари 2017 йил бошида бошланган эди. Сергели—Олмазор метро йўналиши «Чоштепа», «Тошкент ҳалқа йўли», «Сергели», «Афросиёб» ва «Қипчоқ» бекатларидан иборат. «Чоштепа» бекати Чилонзор йўналишидаги «Олмазор» ерости бекати билан боғланади.
Тошкент метросининг Юнусобод йўналишидаги янги қуриб битказилган бекатлар ҳамда ерусти ҳалқа метросининг биринчи босқичи сентябрь ойининг бошида ишга тушганди.
Изоҳ (0)