NASA космик агентлиги Ой юзасида мобил алоқа тармоғини қуришга 14,1 миллион доллар ажратди, деб хабар беради Hi-Tech.Mail.ru.
Таъкидланишича, мобил тармоқдан тадқиқотлар учун Марсга йўл оладиган астронавтлар фойдаланади. Ой базасида 4G ёрдамида барча техника ва транспорт ишлайди, тадқиқотчилар эса ўзаро боғланиши ва файлларни алмашиши мумкин бўлади.
NASA «Артемида» лойиҳаси доирасида 2024 йилдан бошлаб Ойни қайта ўзлаштиришни режалаштирмоқда. Агентлик Ернинг табиий йўлдошига икки кишидан иборат экипаж жўнатади. Улар бир ҳафта давомида Ой юзасида яшайди. Агарда барчаси омадли кечса, 2028 йилга бориб Ойда бир гуруҳ астронавтлардан иборат тўлақонли база қурилади — у камида 15 йил хизмат қилиши керак.
Шу билан бирга, Ойда замонавий 5G алоқа тармоғидан фойдаланиш режалаштирилмаган. Бунинг учун миллиметрли диапазон учун кўпроқ базавий станция керак бўлади, шу сабабли Nokia компанияси синовдан ўтган 4G тармоғидан фойдаланиш ниятида.
Аввалроқ NASA Ойга элтувчи энг қисқа йўлни патентлаганди. 2020 йилнинг июль ойида эса NASA ва Япония АҚШнинг Артемис дастури бўйича ҳамкорликда ишлаш тўғрисидаги келишувни имзолаган. Шунингдек, имзоланган янги келишувга Россиянинг киритилмаслиги АҚШ томонидан 2020 йилнинг май ойида маълум қилинганди.
Изоҳ (0)