Бойқўнғир космодромидан «Союз МС-17» кемаси бошқарувидаги «Союз-2.1а» ракета ташувчиси муваффақиятли парвозни амалга оширди.
Москва вақти билан соат 8:45 да амалга оширилган старт «Роскосмос»нинг YouTube’даги канали орқали тўғридан-тўғри трансляция қилинди. Соат 8:53 да «Союз МС-17» ракета ташувчининг учинчи бўғинидан ажралган ва мақсадли орбитага чиққан.
«Союз» бортида Халқаро космик станциянинг янги экипажи бор — россиялик космонавтлар Сергей Рижков ва Сергей Кудь-Сверчков, шунингдек, NASA астронавти Кэтлин Рубинс.
«Союз МС-17» парвози биринчи бор ўта қисқа схема бўйича амалга оширилмоқда ва уч соатдан бироз кўпроқ вақтни олади — ХКС билан кеманинг уланиши соат 11:52 га режалаштирилган. Одатда Халқаро космик станцияга парвозлар учун олти соатга яқин вақт кетади.
Режага кўра, янги экипаж ХКСда 177 сутка бўлади. Бу вақт ичида россиялик космонавтлар икки маротаба очиқ космосга чиқади.
Эслатиб ўтамиз, Илон Маскнинг SpaceX компанияси томонидан яратилган Crew Dragon космик кемаси 30 май куни Халқаро космик станция томон учирилган эди. 31 май куни эса Crew Dragon ХКСга муваффақиятли туташган. Бортида икки астронавт — Дуглас Хёрли ва Роберт Бенкен бўлган Crew Dragon кемаси Ерга қайтиш учун 2 август куни автоматик равишда Халқаро космик станция (ХКС)дан ажралганди.
Изоҳ (0)