Фото: Бразилиянинг «Канизак Изаура» сериали бош қаҳрамонлари 44 йилдан сўнг

«Канизак Изаура» сериали Бразилия кино тарихидаги энг кўп сотилган лойиҳа саналади. Фильмдаги аёлларнинг гўзал либоси, қулларнинг ҳаёти, шунингдек, ҳамиша мавжуд муҳаббат мавзуси томошабинлар томонидан қизғин баҳсларга сабаб бўлар эди. 1976 йил суратга олинган «Канизак Изаура» сериали экранга узатилгандан сўнг орадан 44 йил ўтди. 2004 йилга келиб Rede Record телекомпанияси сериалнинг ремейкини ишлаб чиқарди. Ҳозирда сериалда иштирок этган актёр ва актрисалар қанчалик ўзгарди, уларнинг ҳаёти қандай кечгани ҳақида қўшимча маълумотларга эга бўлиш имконидан фойдаланинг.

Луселия Сантос

Канизак Изаура образида намоён бўлган Луселия Сантос илк дебют ролини ҳам ажойиб тарзда ижро этди. Актриса сериал устида ишлаш пайтида нималарни бошдан кечирганини шундай эслади: «Суратга олиш ишлари ташландиқ жойда бўлиб ўтган. Ҳеч қандай шароит йўқ, шу туфайли кийимларни алмаштириш ва грим жараёнлари иссиқ автобусларда бажарилар эди. Костюмлар жуда ҳам ноқулай, мен эса доимо кўйлак этагини босиб олар эдим. Ҳаттоки йиқилиб тушган вақтларим ҳам бўлган, корсетлар эса нафас олишни қийинлаштириб юборарди».

Сериал намойишидан сўнг актриса дарҳол машҳурликка эришди. Кейинчалик Луселия дирижёр ва бастакор Жон Нешлинг билан турмуш қурди, аммо уларнинг турмуши узоққа чўзилмади. Актрисанинг бир дона ўғли Педро Нешлинг ҳам ота-онаси каби актёрликни танлаган. Луселия ўғли Педрони энг яқин дўсти деб билади.

Луселия ўтган асрнинг 90 йилларида Тибетга ташриф буюрди ва у ердаги ҳаёт тарзига қизиб қолди. Шунингдек, ушбу саёҳатдан сўнг иккита ҳужжатли фильмни суратга олди. Луселия охирги маротаба 2009 йил «Лула, Бразилиянинг ўғли» картинасида кўриниш берди.

Рубенс ди Фалко

Рубенс ди Фалко сериалда рол ижро этган вақтда анчагина машҳур ва маҳоратли актёр эди. У ўзининг партнёрини зағчадек кичкина ва ориқ қиз эди, деб эслайди. Унинг бўйи пастлиги туфайли 12 сантиметр баландликдаги туфли кийишига тўғри келган. Чунки орамиздаги фарқ сезиларли даражада бўлган. Шунингдек, уни визуал равишда катталаштириш учун корсет билан белини маҳкамлашар эди.

Рубенс лойиҳада кам тажрибага эга бўлган ҳамда унчалик ҳам таниқли бўлмаган актёрлар таклиф этилгани учун сериални муваффақиятсиз чиқишига амин эди. Бироқ орадан йиллар ўтиб, у энг яхши сериал сифатида эътироф этилди. Кейинчалик сериалнинг ремейкида командор Алмейдонинг ролини ҳам ижро этди. Рубенс 2008 йил 22 февралда юрак хуружидан вафот этди. Маълумотга кўра, актёр оила қурмаган ва фарзандлари ҳам бўлмаган.

Роберто Пирильо

Ушбу картинада тасодифан пайдо бўлган ягона актёр. Аслида фильм сценарийсида унинг образи мавжуд эмасди, лекин режиссёр романтик чизиқ сифатида асосий қаҳрамон характерининг биринчи муҳаббатини қўшишга ҳаракат қилган. Актёрнинг 15-эпизодидан сўнг томошабинлар уни чиндан ҳам яхши кўриб қолганди, шунинг учун унинг роли бироз кенгайтирилди.

Норма Блум

Норма ҳақиқий санъат ишқибози. У 11 ёшидан актёрлик фаолиятини бошлаган. 70 ёшида ҳам Бразилия сериалларида ҳанузгача рол ижро этиб келмоқда. «Канизак Изаура»да Норма Изаурага меҳрибон бўлган Леонсининг рафиқаси Малвини ролини ижро этган.

Леа Гарсиа

Леа Гарсиа сериалда ҳасадгўй қул Розани ижро этди. 87 ёшга тўлган актриса ҳамон фильмларда рол ижо этиш билан шуғулланади.

Зени Перейра

Зени ҳам «Канизак Изаура» сериалида ошпаз Жануарни ижро этди. Актриса 2002 йил 77 ёшида вафот этди. Шунингдек, унинг сўнгги роли − «Менинг ватаним» деб номланган сериалда Изаура қаҳрамони сифатида кўриниш берди.

Эдвин Луизи

Бош қаҳрамоннинг турмуш ўртоғига айланган ва уни қулликдан қутқарган «Канизак Изаура» фильмидаги Альваронинг ролини ижро этган Эдвин Луизи сериалнинг машҳурлиги уни биргина рол билан таниқли актёрга айлантиргани учун афсусланади: «Дастлаб сериал намойишидан бир-икки йил ўтиб, мен ўз ролимдан мамнун эдим. Аммо беш йил ўтди, ўн йил ҳам ўтди. Мен бошқа ўнлаб сериалларда рол ижро этдим, спектаклларда иштирок этдим. Аммо ҳеч нарса ўзгармади. Ҳамма учун ҳозиргача Альвароман!», − дейди актёр. У яна шундай машҳурлик олиб келувчи фильмдан таклиф тушишини орзу қилади.