БМТ Инсон ҳуқуқлари бўйича Кенгаши аъзолигига 15 давлат 2021 йил 1 январдан бошлаб уч йиллик муддатга сайлангани ҳақида хабар берилганди. Аъзоликка сайланган давлатлар қаторида Ўзбекистон билан бирга, Россия, Хитой ва Куба давлатлари ҳам бор.
АҚШ Давлат котиби Майкл Помпеонинг таъкидлашича, Россия, Хитой ва Кубанинг БМТнинг Инсон ҳуқуқлари бўйича Кенгашига сайланиши президент Дональд Трампнинг ушбу тузилмадан чиқиб кетиши тўғрисидаги қарорининг тўғрилигини тасдиқлайди.
«Кенгашдан чиқиб кетганимиздан сўнг АҚШ БМТга аъзо давлатларни Кенгаш тузатиб бўлмайдиган бўлиб қолишидан олдин уни ислоҳ қилиш учун зудлик билан чоралар кўришга чақирди. Афсуски, бу чақириқлар эътиборга олинмади ва бугунги кунда БМТ Бош ассамблеяси яна инсон ҳуқуқлари бўйича даҳшатли давлатларни, жумладан, Хитой, Россия ва Кубани сайлади. Венесуэла эса 2019 йилда сайланган эди», – деди Помпео баёнотида.
Мавзуга доир: Помпео Хитойни дунёдаги энг хавфли мамлакат деб атади
Сайловлар яширин овоз бериш орқали ўтказилади ва номзод давлат камида 97 та овоз олиши керак бўлади.
Инсон ҳуқуқлари бўйича кенгаш БМТ тизимидаги ҳукуматлараро орган ҳисобланади. У 47 давлатдан иборат бўлиб, инсон ҳуқуқларини ҳимоя қилиш учун жавобгардир.
Аввалроқ АҚШ давлат котиби Россия ва Хитойни коронавирусга қарши вакцинани пиар қилишда айблаган эди.
Изоҳ (0)