АҚШда иккита дори — ремдесивир ва Eli Lilly компаниясининг антитаначали зардобини биргаликда қўллаган ҳолда COVID-19’ни тажрибали даволашда қатнашиш учун кўнгиллиларни саралаб олиш жараёни «эҳтиёткорлик юзасидан» тўхтатилди, деб хабар бермоқда «Интерфакс».
Eli Lilly тадқиқотларда танаффус бўлиб қолганини тасдиқлади, аммо бунинг сабабини ошкор этмасдан, компания учун хавфсизлик бирламчи эканлиги ҳақидаги баёнот билан чекланди. Тадқиқотларга ҳомийлик қилаётган АҚШ Аллергия ва юқумли касалликлар миллий институти изоҳ беришдан бош тортди.
Associated Press қайд этишича, синовларни давлат регулятори эмас, тадқиқотлар ҳомийси тўхтатиб қўйган, шу сабабли танаффус узоқ давом этмаслиги керак.
ACTIV-3 деб аталувчи тадқиқот августда бошланган эди. Унда АҚШ, Дания ва сингапурлик ётиб даволанаётган 10 мингга яқин бемор қатнашмоқда. Иштирокчиларнинг барчаси АҚШда қўллаш учун шошилинч тарзда рухсат берилган ремдесивирни ҳамда Американинг Eli Lilly компанияси Канаданинг AbCellera компанияси билан ҳамкорликда ишлаб чиқараётган антитаначалардан иборат дорини ёки плацебони қабул қилмоқда.
Eli Lilly’нинг дориси — АҚШ президенти Дональд Трампни даволаш учун берилган Regeneron дорисининг муқобили бўлиб, иккаласи ҳам коронавирусга нисбатан нейтраллаштирувчи антитаначаларга асосланган, аммо Eli Lilly’нинг дорисида антитананинг фақат битта тури, Regeneron’да — иккита тури мавжуд.
Бир кун аввал АҚШда Johnson & Johnson фармацевтик компанияси COVID-19’га қарши вакцина синовларини тўхтатган, бунга тадқиқотлар иштирокчисининг «номаълум» касаллиги сабаб бўлган эди.
Johnson & Johnson’дан ташқари, АҚШда AstraZeneca, Moderna ва Pfizer BioNTech билан ҳамкорликда ўз вакциналарини синамоқда.
Эслатиб ўтамиз, айни пайтда коронавирусга қарши фақат битта вакцина — Россиядаги Гамалея номидаги марказнинг «Sputnik V» вакцинаси рўйхатдан ўтган. У август ойида клиник синовлар тугашидан олдин рўйхатдан ўтказилган.
Изоҳ (0)