АҚШ президенти Дональд Трампни қаттиқ ҳурмат қилиб, унга сиғинган Ҳиндистон фуқароси Бусса Кришна унинг коронавирусга чалингани ҳақидаги хабарга бардош бера олмасдан, юрак хуружидан вафот этди, деб ёзади «РИА Новости». Бу ҳақда Indian Express газетаси унинг оила аъзоларига таяниб хабар қилган.
Трамп коронавирусга чалинганидан кейин Кришна Facebook’ка АҚШ президенти ва биринчи хонимига тезроқ соғайиб кетишни тилаб, таъсирли видеоларни кўп марта жойлаган. Оила аъзолари айтишича, у 11 октябрь, якшанба куни эрталаб уйғониб, ўзини одатдагидек тутган, сўнг эса ерга йиқилган.
«Трамп коронавирус билан касалланганини эшитганидан кейин у тушкунликка тушиб қолди. Овқат кам ерди. Уни касалхонага олиб борганимизда, шифокорлар унинг ўлганини айтди. Ўлим сабаби — юрак хуружи», — деди марҳумнинг қариндоши.
Бусса Кришнада Дональд Трампга нисбатан бундай ҳиссиётлари тўрт йил аввал, Америка президенти унинг тушига кирганидан кейин, пайдо бўлган.
Эслатиб ўтамиз, Дональд Трамп ва унинг рафиқаси Меланияда 2 октябрь куни коронавирусга топширган тест жавоби ижобий чиққан. Сўнг у Уолтер Рид номидаги миллий ҳарбий тиббиёт марказида даволанган.
Аввалроқ шифокорлар Трампнинг бошқаларга коронавирус инфекциясини юқтириш хавфи йўқлигини эълон қилганди. Трампнинг ҳолати АҚШ касалликлар назорати марказининг амалдаги стандартларига мувофиқ уни карантиндан чиқаришга имкон беради. АҚШ президенти 10 октябрдан сайловолди кампаниясига қайта киришган.
Изоҳ (0)