Самарқанд вилояти ҳокими Эркинжон Турдимов журналист ва блогерлар билан мулоқотда ўтган ҳафта давомида ижтимоий тармоқларда кенг муҳокама қилинган оқсоч аёллар масаласига тўхталиб ўтди. Бу ҳақда «Дарё» мухбири Фарҳод Норбўтаев хабар берди.
Таъкидланишича, 12 октябрь куни вилоят ҳокими иштирокида журналист ва блогерлар учун матбуот анжумани ташкил этилган.
«Ҳудудларда оқсоч аёллар, уй хизматчиларини тайёрлаш марказлари очиш, уларнинг ҳуқуқини ҳимоя қилиш борасида таклифим турлича талқин қилинди. Шуни билишингизни хоҳлардимки, бу гапни, аввало, азиз аёлларимиз ҳимояси учун айтдим. Бу соҳада тартиб ўрнатиш, уй хизматчиларининг ҳуқуқини ҳимоя қилиш миллатимизнинг шаънини туширмайди, аксинча юксалтиради. Уларни ўқитадиган марказларни очишнинг ёмон томони йўқ. Таклифим шуки, шундоқ ҳам мавжуд бўлган хизмат турини қонунийлаштириш керак, — деди вилоят ҳокими Эркинжон Турдимов. — Мен ҳам меҳнат бозоридаги вазиятдан хабардор, одамларнинг бугунги ҳаёти билан яхши таниш вилоят раҳбари сифатида ўз таклифларимни билдирдим. Оқсочлар, яъни уй хизматчилари фаолиятини тартибга солиш, бу меҳнат билан шуғулланаётган кишилар ҳуқуқ ва манфаатларини ҳимоя қилишни таъминлаш учун уларни ўқитадиган, ҳимоя қиладиган марказлар ташкил этиш зарурлигини айтдим. Афсуски, буни ҳар ким ҳар хил талқин қилди. Бу ўринда одамларнинг кўнглига оғир ботгани – ‘оқсоч’ сўзи. Лекин истаймизми-йўқми бу фаолият билан шуғулланувчилар аввал ҳам бўлган, бугун ҳам бор».
Вилоят ҳокимининг маълум қилишича, бугунги кунда биргина Самарқанд вилоятининг ўзида 246 минг киши хорижга ишлаш учун кетган. Уларнинг 72 минг 800 нафарини хотин-қизлар ташкил қилиб, 75 фоизи Россияда, 7 мингга яқини Туркияда меҳнат қилмоқда.
«Бугун хорижда ишлаётган аёлларнинг аксарияти уй хизматчиси, энага вазифасини бажаради. Буни яшириш керак эмас, тан олиб, уларнинг манфаатини ҳимоя қилишни ўйлашимиз, мазкур йўналишга ҳам замонавий ёндашишимиз керак. Бадиий асарларда ёки тарихий китобларда ҳам бу сўз учрайди. Бугун кўпроқ уй хизматчиси ёки энага деб номлаймиз. Аммо, тан олайлик, қадимда бундай кишиларни ўша хонадон эгалари ўз яқинларидек қабул қилган бўлса, ҳозирда паст назар билан қарайди. Уларнинг шаъни, қадр-қимматини топташ ҳолатлари ўзимизда ҳам, хорижда ҳам учрамоқда. Шунинг учун ушбу масалага эътибор қаратиб, оқсочларни тайёрлайдиган, уларнинг ҳуқуқларини кафолатлаган ҳолда хизматини таклиф этадиган марказлар ташкил этиш таклифини илгари сурдик», — деди вилоят раҳбари.
Эркинжон Турдимов ҳозирги кунда оилаларга оқсоч, энага топиб беришни даромад манбайига айлантириб олган «тадбиркорлар» борлигини айтиб, уларнинг хизматида ҳеч қандай қонуний асос йўқлигини билдирди.
«Улар кимгадир оқсоч топиб бергани учун ҳақини олиб кетаверади, кейинги меҳнат муносабатлари ҳақида ўйлаб ҳам кўришмайди. Оқибатда бундан кўп ҳолларда иш берувчи ўша оила ёки уларга хизмат кўрсатган уй хизматчиси, энага жабр кўряпти. Шунинг учун бу хизмат тури билан шуғулланишни истовчи аёлларимизга ўз ҳуқуқларини ўргатиш, уй-рўзғор ишларини юритиш бўйича малакасини оширишни амалга оширувчи махсус марказлар ташкил этиш мақсадга мувофиқ. Бу фикр, таклифни азиз аёлларимиз ҳимояси учун билдирдим. Биз бу соҳада тартиб ўрнатилишини, уй хизматчиларининг қонуний ҳуқуқ ва манфаатлари ҳимоя қилинишини истаймиз. Миллат шаънини тушириш учун эмас, юксалтириш учун шундай таклиф айтдик», — деди ҳоким Турдимов.
Эслатиб ўтамиз, 8 октябрь куни Самарқанд вилоят ҳокими Эркинжон Турдимов Президент раҳбарлигида ўтказилган видеоселектор йиғилишида оқсоч аёлларга талаб ортиб бораётгани сабаб аёлларни бу касбга тайёрлаш тизимини шакллантириш таклифини берган эди. Турдимовнинг бу гаплари жамоатчилик орасида кескин танқидларга сабаб бўлди. Кейинчалик Самарқанд вилоят ҳокимлиги ижтимоий тармоқлардаги танқидларга муносабат билдириб, Турдимов ушбу фикри билан аслида нима демоқчи бўлганини тушунтирди. Блогерлар ва ижтимоий фаол фуқаролар Самарқанд вилоят ҳокими жўяли таклиф бергани, уни нотўғри талқин қилмаслик кераклиги ҳақида постлар қолдирган.
Изоҳ (0)