Бугун,

  • USD 11014.01
  • RUB 191.8
  • EUR 10674.78

Ёшлар ишлари агентлигининг Қашқадарё вилояти бошқармаси бошлиғи Шоҳжаҳон Омонов вазифа йўриқномасидаги талабларни қўпол равишда бузиб, юқори турувчи органнинг қарорларини нотўғри талқин қилгани ва агентликни обрўсизлантиришга ҳаракат қилгани учун огоҳлантирилди. Бошқарманинг кадрлар билан ишлаш бўйича мутахассиси Ф.Эшмуродовга ҳужжатлар алмашишдаги қўпол хатолари учун интизомий жазо қўлланилди. Бу ҳақда агентликнинг расмий Telegram каналида хабар берилган.

Фото: «Дарё»

Фото: «Дарё»

Таъкидланишича, «Дарё» интернет нашрида эълон қилинган «Қашқадарёдаги айрим туманларда Ёшлар ишлари бўлимларига агентлик тавсия қилган номзодлар эмас, бошқалар тайинланди. Чунки агентликнинг хати ‘юридик кучга эга эмас’» сарлавҳали мақола агентлик томонидан ўрганиб чиқилган.

«Мазкур ҳолат бўйича барча масъуллар иштирокида йиғилиш ўтказилди ва унда мақолада келтирилган ҳар бир масала чуқур муҳокама қилинди», — дейилади агентлик расмий муносабатида.

«Дарё»даги мақолада Ёшлар ишлари агентлигининг 2020 йил 19 август кунидаги хатида агентликнинг туман ва шаҳар бўлими бошлиқлари лавозимига сараланган номзодларнинг рўйхати келтирилгани, унда агентликнинг Ғузор тумани бўлими раҳбарлигига Н.Саидов, Шаҳрисабз шаҳар бўлимига Ш.Исломов, Чироқчи туман бўлимига А.Бекназаров, Деҳқонобод туманига А.Қулмаматов номзоди тавсия этилгани хабар берилганди. Мақолада шунингдек, бошқарма агентлик хатига амал қилмагани ёзилганди.

«Ўрганишлар давомида агентликнинг вилоят бошқармаси томонидан Ўзбекистон Ёшлар иттифоқи тизимида фаолият олиб борган номзодлар билан суҳбат ташкил қилингани ва натижаларига кўра Деҳқонобод туман бўлими раҳбарлигига О.Нормуродов, Шаҳрисабз шаҳри бўлимига Д.Аҳмедов, Чироқчи туман бўлимига Ж.Хурсандов тайинлангани аниқланди. Бошқарманинг муносабатида таъкидланган тавсия этилган айрим номзодларнинг иш ҳақидан қониқмагани, соҳада тажрибаси етарли эмаслиги, муаммолардан бехабар, иш режаси йўқ, иш ҳақидан бехабар каби сабаблар ва баҳолар мутлақо асоссиздир. Ваҳоланки, агентлик тавсия этган барча номзодларнинг малакаси, билими ва соҳани яхши тушуниши ўтказилган суҳбатлар чоғида аниқланган ҳамда улар ўз розилиги билан бу лавозимларга ишлаш учун қизиқиш билдиришган», — дейди агентлик масъуллари.

Айтилишича, йиғилиш давомида лавозимига тайинланмаган тўрт нафар номзод билан агентлик директори Алишер Саъдуллаев телефон орқали мулоқот ўтказган.

«Чироқчи туман бўлими бошлиғи лавозимига тавсия этилган Алишер Бекназаров ҳозирда тумандаги 170-сонли умумий ўрта таълим мактаби директори бўлиб ишлаётгани, ўз истиқболини таълим соҳасида кўраётганини баён қилди. Унинг ўрнига тайинланган Жамшид Хурсандов фаолиятини давом эттириши белгиланган. Шунингдек, Шаҳрисабз туман бўлими бошлиғи лавозимига тавсия этилган Шерзод Исломов ҳозирда Шаҳрисабз шаҳридаги Ўзбекистон Республикаси бош вазирининг Тадбиркорларнинг мурожаатларини кўриб чиқиш қабулхонаси мудири лавозимида ишлаётгани, фаолиятини тадбиркорлар фаолиятини қўллаб-қувватлаш бўйича давом эттиришини маълум қилган. Унинг ўрнига тайинланган Даврон Аҳмедов фаолиятини давом эттириши белгиланган. Ғузор туман бўлими бошлиғи лавозимига тавсия этилган Нодиржон Саидов ҳозирда саломатлигини тиклаш жараёнида эканлигини ҳамда Халқ депутатлари Ғузор тумани Кенгаши депутати сифатида ёшларни қўллаб-қувватлашда давом этишини билдирган. Деҳқонобод туман бўлими бошлиғи лавозимига тавсия этилган Адҳам Қулмаматов ўз ишини бошлаши белгиланди», — дейилади агентлик муносабатида.

Қўшимча маълумот берилишича, айни кунда Ёшлар ишлари агентлиги марказий аппаратида 75 нафар, ҳудудий бошқармаларда 154 нафар, туман (шаҳар)лардаги бўлинмаларда 406 нафар масъул ходим фаолият олиб бормоқда. Бугунги кунга келиб агентликнинг Қашқадарё вилоят бошқармасида 11 та, туман (шаҳар) бўлимларида 45 та штат жадвали асосида 56 нафар раҳбар ва масъул ходим фаолияти йўлга қўйилган.

Агентлик муносабати сўнгида «Дарё» нашри билан ҳамкорликка тайёрлигини маълум қилган.

«Ўзбекистондаги етакчи интернет нашрларидан бири ҳисобланган ‘Daryo.uz’ сайти журналистларининг ёшлар масаласи бўйича танқидий ва таҳлилий чиқишлари ва бу мавзуга доимий эътиборини юқори баҳолаган ҳолда агентлик фаолиятига дахлдор ОАВдаги ҳар қандай чиқишларга тезкор, холис ва ҳаққоний муносабат билдириб борилиши таъминланишини, журналистлар билан ҳамкорлик учун доимо очиқлигини яна бир бор таъкидлаймиз», — дейилади агентлик ахборот хизмати муносабатида.

Изоҳ
Асосий янгиликлар