Ўзбекистонда 2020/2021-ўқув йилидан бошлаб коллеж ва техникумларда тайёрлов йўналишлари кесимида тўлов-контракт асосида бир ўқувчини ўқитиш қиймати тасдиқланди. Бу ҳақда Олий ва ўрта махсус таълим вазирлиги хабар берди.
Унга кўра, соғлиқни сақлаш, педагогика, бизнес ва бошқарув, санъат, ижтимоий таъминот, хизмат кўрсатиш, журналистика ва ижтимоий ахборот йўналишлари учун бир ўқувчини ўқитиш қиймати меҳнатга ҳақ тўлашнинг энг кам миқдори (9 октябрь ҳолатига кўра 679 330 сўм) 6,2 баробарида (4 211 846 сўм) бўлади.
Табиий фанлар, транспорт, муҳандислик иши, алоқа ва ахборотлаштириш, телекоммуникация технологиялари, компьютер технологиялари ва информатика, гуманитар фанлар (телевидение йўналиши) йўналишлари учун меҳнатга ҳақ тўлашнинг энг кам миқдори 6,0 баробарида (4 075 980 сўм) белгиланди.
Қишлоқ хўжалиги ирригацияси ва мелиорацияси, қишлоқ, ўрмон ва балиқ хўжалиги, ишлаб чиқариш ва қайта ишлаш тармоқлари, архитектура ва қурилиш, ҳаётий фаолият хавфсизлиги, қишлоқ хўжалиги техникаси, ветеринария, атроф-муҳит муҳофазаси йўналишларида ўқитиш қиймати меҳнатга ҳақ тўлашнинг энг кам миқдорининг 5,8 баробарида (3 940 114 сўм) бўлади.
Хабарда айтилишича, меҳнатга ҳақ тўлашнинг энг кам миқдори оширилганда тўлов-контракт қиймати миқдорлари навбатдаги ўқув семестри бошида мос равишда оширилади.
Изоҳ (0)