Самарқандда аҳолининг табиий газ учун тўлаган 59 млн сўмдан ортиқ пулларни ўзлаштирган шахс ушланди

Самарқандда аҳолидан табиий газ учун йиғилган пулларни ўзлаштирган шахс ушланди, деб хабар бермоқда ИИВ ҳузуридаги Тергов департаменти.

Маълум бўлишича, 2020 йилнинг январь ойида Самарқанд газ таъминоти филиали билан Пастдарғом туманида фаолият юритувчи хусусий корхона ўртасида икки томонлама, яъни аҳоли томонидан табиий газ учун тўланган тўлов пулларини қабул қилиб, ҳисоб рақамларига ўтказиш бўйича шартнома тузилган.

Шартнома шартларига кўра, хусусий корхона иш бошқарувчиси 29 ёшли Б.Б. Пастдарғом тумани газ таъминоти бўлимининг маъмурий биносида туман аҳолисидан табиий газ учун тўловларни нақд пул шаклида қабул қилиб, фуқароларга муҳрланган тўлов квитанцияларини тақдим қилиши ва пул маблағларини газ таъминоти филиали ҳисоб рақамига ўтказиш фаолияти билан шуғулланиши лозим бўлган.

2020 йилнинг август ойи давомида хусусий корхона иш бошқарувчиси Б.Б. Пастдарғом туманида яшовчи жами 264 нафар фуқаролардан табиий газ истеъмоли учун тўлов қилинган жами 59 миллион 322 минг сўм пулларни қабул қилиб олиб, уларга муҳрланган квитанциялар тақдим қилган бўлса-да, ушбу пул маблағларини газ таъминоти филиали ҳисоб рақамига ўтказмасдан, ўз эҳтиёжларига сарфлаб юборган.

Ўзининг жиноий қилмишларини эса ушбу пул маблағлари газ таъминоти филиалининг ҳисоб рақамига тушганлигини кўрсатувчи сохта маълумотларни киритиб яширган. Бу ишларни Пастдарғом тумани газ таъминоти бўлимининг масъул ходими 25 ёшли Ш.Ў. билан жиноий тил бириктириб амалга оширган.

Ҳолат юзасидан Самарқанд вилояти ИИБ ҳузуридаги Тергов бошқармаси томонидан Жиноят кодексининг 167-моддаси 2-қисми «в» банди (ўзлаштириш ёки растрата йўли билан талон-торож қилиш) билан жиноят иши қўзғатилган. Ҳозирда тергов ҳаракатлари давом эттирилмоқда.