“Temir xotin” va “To‘ylar muborak” filmlari yulduzi Dilorom Qambarova hozir qayerda? (foto)

Dilorom Qambarova O‘zbektelefilm kinostudiyasidagi faoliyati davomida “XX asr qaroqchilari”, “Olovli yo‘llar”, “To‘ylar muborak” hamda “Temir xotin” kabi 20 dan oshiq filmlarda suratga tushgan.

Yoshlik va san’atga yo‘l

Dilorom Qambarova 1957-yil 27-aprel kuni Farg‘ona viloyatining Marg‘ilon shahrida dunyoga keldi. Diloromning ota-onasi shifokor edi, o‘zi esa yoshligida sharqshunos bo‘lishni orzu qilgan. Ammo 15 yoshga to‘lganida taniqli rejissor Ali Hamroyevning nazariga tushib, “Qo‘rquv bilmas”, “Yettinchi o‘q” kabi filmlarda debyut rolini ijro etgan. Aktrisa hali makatbda o‘quvchi bo‘lganligi tufayli suratga tushish ishlariga unchalik ham qiziqmaydi. Ammo rejissorning taklifi bilan kino san’atiga qadam qo‘yadi.

Ijodiy faoliyati

1978-yil aktrisa “Issiq quyosh taftidagi uy” kartinasidagi roli uchun Yerevanda bo‘lib o‘tgan Xalqaro festivalda “Yilning eng yaxshi aktrisasi” unvoniga sazovor bo‘ldi. Aktrisa o‘zining yutuqlaridan ruhlanib, o‘z mahoratini oshirishga qaror qildi. U Toshkentdagi san’at oliygohini tamomlagach, Moskva Kinematografiya institutining Makarova kursida ta’lim oldi.

Dilorom Qambarovaga “XX asr qaroqchilari” filmi chindan ham omad olib keldi va u muxlislarga Maa qahramoni sifatida tanildi. 1985-yil aktrisaga “O‘zbekistonda xizmat ko‘rsatgan artist” unvoni berildi.

1992-yilda namoyish etilgan “Dallol” filmi tomoshabinlar hamda tanqidchilar tomonidan yaxshi kutib olinmadi. Kartinada mashhur aktyorlar ishtirok etganiga qaramay, komediya mo‘tadil bo‘lib chiqdi. Ijodiy inqiroz ana shu tarzda boshlandi va aktrisa filmlarga boshqa taklif etilmadi.

Hayotni tubdan o‘zgartirish

Aktrisa bir qancha muddat yangi loyihalarni kutdi, gohida o‘zi uchun mos ish izladi, shundan so‘ng uning kasbiga bo‘lgan qiziqishi ham kamaya boshladi. Shuning uchun ham  u hayotini tubdan o‘zgartirishga qaror qildi. Aktrisa taniqli rejissor Vladimir Xotinenko bilan oila qurdi va qiz farzandli bo‘ldi. Er-xotinning munosabati Ommaviy axborot vostilariga tarqalmaganligi uchun ularning ajrimi sababi haqida ham to‘liq ma’lumot yo‘q.

90-yillarda aktrisaning Amerikaga ko‘chib ketishiga ishsizlik va yana ko‘plab muammolar sabab bo‘ldi. U kinodagi faoliyatini yodga olmay, modalar uyida ish bilan tinimsiz shug‘ullandi. Hozirda uning qizi Polina Myunxen va Los-Anjelesda dizayner bo‘lib ishlaydi va yashaydi. Dilorom Qambarova o‘tgan hayotini eslatib yoki ta’kidlab turadigan barcha narsadan voz kechdi, karyerasini tark etdi, ijtimoiy tadbirlarda qatnashishni to‘xtatdi. Aktrisa o‘zi uchun shunday yopiq hayot tarzini tanladi.