Спорт билан шуғулланиш соғлиқ учун фойдали. Лекин уни куннинг қайси қисмида амалга ошириш жуда муҳим. Мутахассислар иложи борича машғулотларни тонгда бажаришни тавсия этади. Эрталабдан бажарилган машқлар кун давомида тетиклик ҳамда яхши кайфият бахш этади.
Эрталабки жисмоний машғулотлар иштаҳани камайтиради
Эрта тонгдан бир ярим соат мобайнида спорт билан шуғулланиш натижасида кун давомида иштаҳа бўлмайди ва ортиқча овқатланиш хавфини камайтиради. Бригам Янг университети томонидан олиб борилган тадқиқотлар шуни кўрсатдики, атиги 45 дақиқалик кучли жисмоний машқлар озиқ-овқатга, айниқса, ширинликка бўлган иштиёқни камайтиради.
Ёғларни эритишда самарали усул
Оч қоринга жисмоний машқ бажариш ҳар ким учун ҳам тўғри келавермайди. Аммо кўплаб илмий тадқиқотлар бунинг самарадорлигини исботлаган. Агар шифокор маслаҳатидан сўнг организмда бирор салбий ўзгариш сезилмаса, оч ҳолатда олиб борилган машғулотлар вазн йўқотишда тезроқ самара беради. Шунингдек, овқатланмасдан олиб борилган машғулотлар овқатдан сўнг бажарилган машқларнинг натижасига қараганда 20 фоиз юқорида туради. Агар мақсад вазн тўплаш бўлса, машғулот олдидан оқсилга бой бўлган маҳсулотларни истеъмол қилиш мумкин.
Мия фаолиятини рағбатлантиради
Эрталабки машқлар адреналин ва кортизол гормонларининг тарқалишига ёрдам беради. Булар стресс гормонлари бўлишига қарамай, айнан улар ҳушёрлик ва огоҳликни сезиларли даражада оширади. Агар иш, турмуш муаммолари қийнаётган бўлса, жисмоний машқлар танани уйғотади ва мия фаолиятини яхшилайди.
Энергия манбайи
Маълумки, мунтазам равишда машқ қилиш энергия даражасини оширади ва чарчоқни бартараф этишга ёрдам беради. Статистик маълумотларга кўра, ҳафтасига 3-4 марта жисмоний машқлар билан шуғулланган одамлар бошқаларга қараганда 65 фоиз камроқ чарчоқни ҳис қилади. Агар жисмоний машқ куннинг биринчи ярмида амалга оширилса, кун давомида чарчоқ деярли сезилмайди.
Яхши кайфият
Жисмоний машқлар пайтида кортизолдан ташқари, бахт гормонлари – серотонин ва дофамин ажралиб чиқади. Кучли машқлар стресс гормонлари даражасини барқарорлаштиради ва уларнинг қондаги концентрациясини назорат қилишга ёрдам беради. Эрталабки машқлар бутун кун учун яхши кайфият бахш этади ва турли қийинчиликларга бардошли бўлишда ёрдам беради.
Мушакларнинг ўсиши
Мушаклар самарали ўсиши учун тестостерон гормони талаб қилинади, унинг танадаги даражаси эса эрталаб юқори бўлади. Кечки эмас, айнан тушликкача амалга оширилган спорт машғулотлари тезроқ натижа кўрсатади. Энг муҳими, нонушта қилишни унутмаслик керак, чунки бу мушакларнинг ўсиши учун жуда зарур.
Уйқу сифатини яхшилайди
Юқорида айтилганидек, машғулот қон айланишини яхшилайди. Шунингдек, узоқ вақт давом этадиган кучли тетиклаштирувчи таъсирга эга. Шунинг учун кечки машқ бажарилгандан сўнг ухлаш қийин бўлиши мумкин. Эрталабки жисмоний машқлар эса куни бўйи куч бағишлайди ва хотиржам ухлашда ёрдам беради.
Изоҳ (0)