Дори маҳсулотларини тўғри қабул қилиш уларнинг самардорлиги калитидир. Баъзида одамлар шифокор тавсия қилган дори кутилган натижани бермаганлигидан шикоят қилади. Афсуски, бунга сабаб дори йўриқномасида кўрсатилган тавсияларга амал қилмаслик эканини билмайди. Масалан, йўқирномада дори хусусиятлари ва уларнинг организмга таъсирини ўзгартириш мумкин бўлган маҳсулотлар билан ёки бошқа дорилар билан биргаликда қабул қилиш ҳақида батафсил маълумот берилади.
Нима учун айрим ичимликларни дорилар билан қабул қилиш мумкин эмас?
Дори воситаларининг самара бермаслигининг яна бир сабаби – мумкин бўлмаган ичимлик билан истеъмол қилинишидадир. Улар турли хил кимёвий моддалар таъсирида дори тузилишини ўзгартиради, дори қобиғини муддатидан аввал эритади, терапевтик таъсирини кучайтиради ёки аксинча, заифлаштиради, дори-дармонларнинг ножўя таъсири туфайли ошқозон-ичак тракти зарарланади.
Кўрсатмани диққат билан ўқиш лозим
Кўпинча қўлланмада дори воситалари билан ичиш мумкин бўлмаган ичимликлар рўйхатига келтирилган бўлади. Агар бундай маълумот қайд этилмаган бўлса, дори ҳамда витаминлар қайнатилган ва хона ҳароратида совутилган сув билан қабул қилиниши керак. Қайнаган сув таркибида чўкмалар ҳосил бўлади ва бундай сув дорининг таркибий қисмлари билан реакцияга киришмайди.
Дори-дармонлар билан қабул қилиниши тақиқланган ичимликлар
Спиртли ичимликлар дориларнинг фаол таркибий қисмлари билан алоқада бўлиб, уларнинг тузилишини ўзгартиради ва дори моддалари билан биргаликда танага таъсир қилиши натижасида гепатотоксия эҳтимолини оширади. Масалан, уларга яллиғланишга қарши дорилардан ибупрофен, диклофенак, шунингдек, парацетамол, антибиотиклар каби препаратлар киради. Спиртли ичимлик билан фақат битта таблетка ичилса ҳам жигарда қайтариб бўлмайдиган жараёнлар юзага келади. Спиртли ичимликлар дорилар билан таъсирга киришиб, заҳарли бирикмаларни ҳосил қилади ҳамда организмни хавф остига қўяди.
Минерал ва сут билан биргаликда дори воситасини қабул қилиш зарарсиздек кўриниши мумкин. Аммо ушбу ичимликлар баъзи дори воситаларининг таъсир кучини камайтириши мумкин, айниқса, ошқозон ширасида препаратни эритиб юборишга йўл қўймайдиган қопламали дорилар шулар сирасидан. Шунингдек, айрим ҳолларда истеъмол қилинган минерал сув дори воситасини оғиз бўшлиғи ёки қизилиўнгачда эритиб юборади, бунинг натижасида ошқозон кислотаси препаратнинг модда алмашинув жараёнини бузиб юборади. Бу каби капсулалар шаклида бир неча антибиотик ва диабетга қарши воситалар ишлаб чиқарилади, албатта, уларни қандай истеъмол қилиш дори воситасининг йўриқномасида кўрсатилган.
Шарбат таркибидаги моддалар дорилар билан кимёвий реакцияга киришишга қодир. Ушбу ичимлик таъсирида дориларнинг сингиши ёки модда алмашинуви жараёни бузилади. Айниқса, грейпфрут мевасидан тайёрланган шарбат кўплаб дориларга мос келмайди, моддалар фаоллигини сусайтиради, шу жумладан, дори самарадорлигини пасайтиради. Шу билан бирга, барча цитрус мевалар ва улар асосида тайёрланган ичимликлар ҳам салбий таъсир кўрсатиши мумкин, демак, улар билан дори воситаларини қабул қилишга йўл қўймаслик керак.
Чой таркибида кучли қорайиш ва бириктирувчи хусусиятларга эга бўлган модда оғиз контрацептивлари, кодеин ва бошқа дориларнинг самарадорлигини пасайтириши мумкин. Аммо бу дори қабул қилганда чойдан воз кечиш керак дегани эмас, тахминан 3 соатдан кейин чой ичиш мумкин. Сабаби шу соат давомида дори организмга сўрилиб улгурган бўлади.
Қаҳва бронхиал астма ва бошқа бир қатор касалликларни даволашда қўлланиладиган препаратларни истеъмол қилишда ножўя таъсирлар хавфини оширади. Ушбу маҳсулотларни бир вақтнинг ўзида истеъмол қилишда бош оғриғи, юрак уришининг тезлашиши, ортиқча безовталик пайдо бўлиши мумкин.
Газли ичимликларнинг таркибида минерал, туз ва бошқа моддалар мавжуд бўлиб, уларнинг ўзаро таъсири натижасида препаратнинг таркибий элементлари билан биргаликда модда алмашинуви бузилади ва салбий оқибатларга олиб келади.
Шуни унутмаслик керакки, айрим биологик қўшимча ва витаминлар ҳам худди дори воситалари каби бошқа ичимликлар билан қабул қилинганда реакцияга киришади. Шунинг учун ҳар қандай вазиятда шифокор билан маслаҳатлашиш олдинда турган номаълум хавфдан ҳимоя қилади.
Изоҳ (0)