Мода ортидан таъқиб қилиш билан кўпинча аёллар ўз соғлиғини хавф остига қўяди. Британия Хиропрактика Ассоциацияси томонидан ўтказилган тадқиқотга кўра, сўровнома иштирокчиларининг 73 фоизи нотўғри танланган кийим ва буюм туфайли бел оғриғидан азият чекмоқда. Шунингдек, аёлларнинг 28 фоизи кийилган либос, тақинчоқлар бел ва унинг ҳолатига таъсир қилишидан хабардор, аммо қолган 33 фоизи уларнинг қандай зарар етказиши мумкинлигини билмайди.
«Беморларнинг аксарияти уларнинг кийимлари ва аксессуарлари бел соҳасига таъсир қилиши, шу билан бирга, сурункали сколиоз ва бошқа касалликларни келтириб чиқаришини билмайди. Аммо айримлари буларни билган ҳолда зарар етказадиган кийимларни кийишда давом этади ва оғриқни енгиб ўтишлари ҳайратга солади», − дейди БХА терапевти Тим Хатчфул.
Хатчфулнинг сўзларига кўра, баъзи кийимлар зарарли бўлиб, тизза ва сонда ҳаракатланишни қийинлаштиради, шу сабабдан артериялар зўриқади ва қон айланишини секинлаштиради.
Бел оғриғига олиб келиши мумкин бўлган 5 та нарса билан танишинг:
- Тор жинси шим;
- Бир елкага осиладиган ҳажми катта сумка;
- Катта капюшонли палто;
- Баланд пошнали туфли;
- Тўпиқсиз пойабзал.
«Биз булардан бутунлай воз кечиш керак демаймиз, аммо улардан фойдаланишда меъёрни сақлаш керак, − дейди Хатчфул. − Масалан, ҳар куни баланд пошнали туфли кийиш зарар. Агар куни бўйи тик оёқда юришга тўғри келса, баланд пошнадан воз кечиш керак. Ҳеч бўлмаганда иш жойида қулай бўлган либос ва оёқ кийимлардан фойдаланиш лозим. Бунинг учун тана, албатта, эгасидан миннатдор бўлади».
Айтганча, сўнгги бир неча йил ичида шифокорлар тез-тез тор жинси шим зарарлари ҳақида гапирмоқда. 2015 йилда 35 ёш аёлнинг жуда тор жинси шими туфайли оёқ ва тўпиқлар ишиб, юролмайдиган даражада заифлашгани ҳақида касаллик тарихи мавжуд. Беморга «компартмент» синдроми ташхиси қўйилди. Унга кўра, ортиқча босим туфайли тана аъзолари ишиши кузатилган.
Кўпинча аёллар бир ёки икки ўлчам кичик либосни кийиш оздиришга ёрдам беради, деб ўйлайди. Афсуски, бундай эмас. Вазн ташлашдан аввал ҳам қулай ва кенг либос кийган маъқул. Яхшиси, вазн ташлагандан сўнг бир неча ўлчамга кичик либосни сотиб олиш тавсия этилади.
Катта ҳажмдаги шляпалардан иложи борича камроқ фойдаланиш керак. Сабаби у бўйинни толиқтириб қўяди.
Ҳар куни фойдаланиладиган сумка ҳажман катта бўлса, дарҳол кичикроғидан ишлатиш тавсия этилади. Сумка қанча катта ва оғир бўлса, бўйин ва бел шунча таранглашади. Қўлтиқ остига тақиш керак бўлган сумкалар ҳам умуртқа поғонаси ва елка учун хавфли ҳисобланади.
Баланд пошнали оёқ кийимлар умуртқа поғонасини зўриқтиради. Шунинг учун бундай пойабзални вақти-вақти билан паст пошна ёки кроссовкалар билан алмаштириш тавсия этилади.
Шунингдек, ишда, уйда елка ҳолатига эътиборли бўлиш муҳим. Одатда улар тўғри ва икки чети бироз ерга қараб туриши керак.
Изоҳ (0)