Олий Мажлис Сенати раиси Танзила Норбоева Наманган вилоятининг Янгиқўрғон туманида бўлиб ўтган сессияда қатнашди. Бу ҳақда «Дарё» мухбири Азизбек Абдувалиев хабар бермоқда.
Сессияда сўзга чиққан Сенат раиси Танзила Норбоева туман раҳбарлари ва депутатларни рейтингда ҳолати «қониқарли» деб баҳоланган ҳудудлар тажрибасини ўрганиш, туманда тайёрланган йўл харитасини депутатларнинг таклиф ва ташаббуслари асосида қайта кўриб чиқишга чақирди.
«Депутатлар сўровчи эмас, талаб қилувчи бўлиши керак. Мана, Хўжаобод туманида маҳаллий кенгаш талаби билан ҳоким ишдан олинди-ку? Яқинда кенгашларда ишчи орган сифатида котибиятлар ҳам ташкил этилади. Бу уларнинг тўлақонли фаолият юритишини таъминлаш учун ташланган яна бир қадам бўлади», — деди Танзила Норбоева.
Сессия якунлангандан сўнг Сенат раиси иштирокида матбуот анжумани бўлиб ўтди.
«Ҳар қандай даражадаги раҳбар ОАВ учун очиқ бўлиши керак. Президентнинг ҳам талаби шундай. Шахсан ўзим журналистларни энг яқин ҳамкорим деб биламан ва улар билан мулоқотга доим тайёрман», — деди Сенат раиси.
Танзила Норбоева Наманганда ўзига ўт қўйган аёл воқеасига ҳам тўхталиб ўтди.
«Ҳодиса бу қадар фожиали тус олмаслиги керак эди. Харид қилинган уй-жой билан боғлиқ масала чигал, муаммоли бўлса, ижросини кечиктириб туриш мумкин эди-ку? Ўртада бир аёл ҳалок бўлди, икки боласи етим қолди. Бундай ҳолатлар асло такрорланмаслиги керак, буни кескин қоралайман», — деди Сенат раиси.
Шу куннинг ўзида Наманган вилоятидаги ижтимоий-иқтисодий ривожланиш ҳолати «қониқарсиз» деб топилган Мингбулоқ туманида ҳам депутатлар ва ОАВ вакиллари иштирокида сессия бўлиб ўтди.
Изоҳ (0)