Фарғона вилоятининг барча шаҳар ва туманларида йўл ҳаракати қоидаларини бузган ҳайдовчининг машинасини автоматик равишда қайд қилувчи видеокамералар ўрнатилмоқда. Бу ҳақда «Дарё» мухбири хабар берди.
Мазкур кузатув камералари ҳаракат хавфсизлигини таъминлаш, йўл-транспорт ҳодисаларининг олдини олиш, қоидабузарликларни аниқлашда инсон омилини камайтириш мақсадида ишга туширилган.
Қайд этилишича, ушбу қурилмалар тўхташ ва тўхтаб туриш қоидаларига амал қилмаган транспорт воситаларини онлайн тарзда аниқлайди.
Ушбу ақлли қурилмалар транспорт воситалари тўхтаган вақтни белгилаб олади. Ҳайдовчиларга белги остида тўхтаб, йўловчини тушириб кетиши учун 1 дақиқа вақт беради. Агар ҳайдовчи шу вақтда йўловчисини тушириб, кетишга улгурса, унга жарима ёзилмайди. 1 дақиқадан сўнг камера яна ўша жойга қайтиб, вақт ҳамда фотосуратларни таққослайди. Автоматик тарзда автомашина рақамини аниқлаб, қоидабузарлик бўйича қарор қабул қилади.
Айни вақтга қадар Фарғона, Қўқон, Марғилон шаҳарларида ҳамда Данғара туманида «тўхташ тақиқланган» белгиси остида қолдирилган автомобилларни қайд этувчи ўн тўртта видеокамера ўрнатилган.
Ушбу фотовидео қайд этиш қурилмалари орқали 15 минг 430 та қоидабузарлик аниқланиб, 7 миллиард 293 миллион 477 минг сўм жарима ундирилган.
Тез орада бу каби видеокамералар вилоятнинг Риштон, Тошлоқ, Сўх, Ўзбекистон ва Бувайда туманларида ҳам ишга туширилади.
Маълумот учун, «тўхташ тақиқланган» белгиси остида қолдирилган автомобиллар ҳайдовчилари ушбу қоидабузарлик учун энг кам ойлик иш ҳақининг уч баравари миқдорида жарима тўлаши керак бўлади.
Изоҳ (0)