“U otasining ishlarini davom ettirib, xalqni rozi qiladi, deb ishonaman” — Shavkat Mirziyoyev Qoraqalpog‘istonning yangi rahbari haqida

Koronavirus butun dunyoda bo‘lgani kabi O‘zbekistonga ham yo‘qotishlar olib keldi, lekin hayot davom etadi, shu sharoitga munosib bo‘lib, to‘g‘ri yo‘l topish zarur. Bu haqda Prezident Shavkat Mirziyoyev Qoraqalpog‘iston Jo‘qorg‘i Kengesining 2-oktabr kuni ochilgan navbatdan tashqari sessiyasidagi chiqishida aytib o‘tdi.

Prezidentning ta’kidlashicha, hozirgi murakkab paytda rahbar bo‘lish oson emas, shunga qaramay Qoraqalpog‘istonni rivojlantirish bo‘yicha boshlangan ishlar ikki-uch karra ko‘paytirib davom ettiriladi. Prezident ayni yig‘ilishda Qoraqalpog‘istonning yangi rahbari etib saylangan Murat Kamalovga baho berarkan, u otasi Qallibek Kamalov ishlarini davom ettirib, xalqni rozi qilishiga ishonch bildirdi.

Murat Kamalovni ko‘p yillardan beri taniyman. U avvalo halol odam, vatanparvar odam. Qayerda ishlagan bo‘lmasin, qoraqalpoq elining dardi bilan yashaganiga guvohman. Eng asosiysi shu. Boshqasi tajriba bilan keladi.

U otasi Qallibek Kamalov, marhum Musa Yerniyazov ishlarini davom ettirib, xalqni rozi qiladi, deb ishonaman.

Shavkat Mirziyoyev, O‘zbekiston Prezidenti

Eslatib o‘tamiz, 65 yoshli Murat Kamalov 2020-yil 20-sentabr kuni bo‘lib o‘tgan navbatdan tashqari saylovlar vaqtida Jo‘qorg‘i Kenges deputati etib saylangan edi. Saylovlar arafasida e’lon qilingan nomzodlar ro‘yxatidagi ma’lumotlarga ko‘ra, Ekopartiya a’zosi hisoblangan Kamalov saylovgacha Prezident huzuridagi Orolbo‘yi xalqaro innovatsiya markazi direktori lavozimida ishlab kelgan.

Ma’lumot uchun, Qoraqalpog‘istonning Murat Kamalovdan avvalgi rahbari hisoblangan Musa Yerniyazov 2020-yil 31-iyul kuni koronavirus infeksiyasi asoratlari oqibatida vafot etgan edi. Murat Kamalovning otasi Qallibek Kamalov esa 1963—1984-yillarda Qoraqalpog‘istonga rahbarlik qilgan. 94 yoshli Qallibek Kamalov 2017-yilda Prezident Shavkat Mirziyoyevning farmoni bilan “El-yurt hurmati” ordeni bilan mukofotlangan.