Тоғли Қорабоғда нима бўляпти? Озарбайжон президенти ва Арманистон бош вазири Россия телеканали эфирида шу ҳақда сиртдан баҳслашди

Тоғли Қорабоғ муаммоси сабаб 27 сентябрдан бери Озарбайжон ва Арманистон ўртасида қуролли тўқнашув давом этмоқда. 29 сентябрь куни ҳар иккала мамлакат етакчилари юзага келган вазият ҳақида «Россия 24» телеканалининг «60 минут» («60 дақиқа») дастурига жонли эфирда интервью берди. Meduza нашри Илҳом Алиев ва Никол Пашинян чиқишларидаги асосий нуқталарни териб чиқиб, қисқача баён қилди.

Илҳом Алиев, Озарбайжон президенти: Арманистон 27 сентябрь куни бизнинг аҳоли пунктларимиз ва жанговар марраларимизни артиллериядан ўққа тутди. Биргина тинч аҳоли вакиллари орасида 11 киши, хусусан, икки нафар бола ҳалок бўлди. Бу олдиндан режалаштирилган ҳарбий провокация эди: (Сорос томонидан қўйилган) Арманистон бош вазири Никол Пашинян халқ эътиборини ички муаммолардан чалғитмоқчи. Биз жавоб беришга мажбур бўлдик. Учинчи кундирки жанглар давом этмоқда. Туркия бизга фақат руҳий-маънавий кўмак кўрсатмоқда. Суриядан чиққан жангарилар низода қатнашмаяпти, бу арман тарғиботининг ёлғони (фейк). Агар Пашинян очиқчасига: «Қорабоғ — бу Арманистон, вассалом», деб турган бўлса, қандай музокаралар ҳақида сўз бориши мумкин? Арманистон Қорабоғдаги статус-квони сақлаб қолиш учун музокара жараёнини йўққа чиқаришга интилмоқда. Бу бизга маъқул эмас.

Никол Пашинян, Арманистон бош вазири: Озарбайжон 27 сентябрь куни Тоғли Қорабоғга нисбатан ҳарбий босқин бошлади, орадан уч кун ўтиб эса Арманистон ҳудудидаги қишлоқларни бомбардимон қилишга киришди. Ҳарбийлар орасида ҳам, тинч аҳоли орасида ҳам қурбонлар бор. Бу операция Озарбайжон ва Туркиянинг ҳарбий машғулотлари вақтида режалаштирилган. Жанговар ҳаракатларга юқори мартабали турк ҳарбийлари бошчилик қилмоқда. Туркия Суриядаги ёлланма жангариларни оғдириб, Озарбайжонга ташламоқда. Биз буни арман халқига қарши эълон қилинган уруш сифатида қабул қиляпмиз. Халқаро ҳамжамият Озарбайжон ва Туркия агрессиясини қоралаши лозим. Ҳарбий ҳаракатлар давом этаётган вақтда музокаралар ҳақида гапириш қийин. Даставвал куч ишлатишни тўхтатиш лозим.

Ҳар иккала мамлакат етакчиларидан олинган интервьюнинг тўлиқ шаклини бу ерда (рус тилида) томоша қилиш мумкин.