Коронавирус билан боғлиқ вазиятнинг ёмонлашгани сабабли Франция пойтахти Париж ва мамлакатнинг яна 10 дан ортиқ шаҳрида 28 сентябрдан бошлаб янги чеклов чоралари амал қилади. Бу ҳақда «Интерфакс» хабар берди.

Фото: EPA

Хусусан, байрам ва кўнгилочар тадбирлар, жумладан, никоҳ маросимлари, фестиваллар, талабалар кечаларини ўтказишга чекловлар жорий қилинди.

Барларнинг тунги соат 22:00 дан эрталаб 06:00 гача ишлаши тақиқланди. Ёпиқ иншоотлардаги спорт заллари ва спорт марказлари ёпилди.

Кинотеатрлар, музейлар ва театрлар қатъий хавфсизлик чораларига амал қилган ҳолда ишини давом эттириши мумкин. Сув ҳавзалари ҳам ташриф буюрувчилар учун очиқ қолади.

Франция соғлиқни сақлаш вазири Оливье Веран COVID-19 тарқалиши билан боғлиқ вазият ёмонлашаётгани сабабли мамлакат аҳолисини ижтимоий муносабатларни камайтиришга чақирган. Шунингдек, вазир коронавирус тарқалиш хавфи юқори бўлган ҳудудларда иш берувчиларга иш режимини масофавий ташкил қилишни тавсия этган. Бундай ҳудудлар қаторидан Бордо, Лилль, Ницца, Париж ва Тулуза шаҳарлари ўрин олган.

Шу пайтга қадар Францияда коронавирус билан касалланиш бўйича 540 мингта ҳолат қайд этилган, тахминан 31 минг киши касаллик қурбонига айланган.

Аввалроқ Францияда коронавирус билан касалланиш ҳолатлари сони тўрт баравар ошгани ҳақида хабар берилганди.