Россияда июнь ойидан буён илк бор 8 мингдан ортиқ кишида COVID-19 аниқланди

Россияда сўнгги суткада 8135 кишида коронавирус аниқланди, деб хабар бермоқда «РБК» коронавирус инфекциясига қарши кураш бўйича тезкор штабга таяниб.

Сўнгги марта 8 минг кишидан ортиқ касалланиш 16 июнда қайд этилган. Шу куни 8248 кишида COVID-19 аниқланган. Тезкор штаб маълумотларига кўра, мамлакатда бутун пандемия давомида 1 159 573 киши коронавирусга чалинган. Айни пайтда мамлакат коронавирусга чалинганлар сони бўйича дунёда тўртинчи ўринда.

Янги касалланиш ҳолати Адигедан ташқари мамлакатнинг барча ҳудудларида аниқланган. Сўнгги суткада коронавирус аниқланганларнинг 2200 нафари (27 фоизи)да касалликнинг клиник белгилари кузатилмаган. Касалланиш ҳолатининг суткалик ўсиш сурати 0,7 фоизни ташкил этган.

Тезкор штаб маълумотларига кўра, сўнгги суткада корнавирусга чалиниш бўйича энг кўп ҳолат Москва шаҳри (2217 киши), Санкт-Петербург (237), Москва (212 киши) ва Ростов (193) вилоятларида қайд этилган.

Эслатиб ўтамиз, Россияда 23 сентябрь куни 6431 кишида, 24 сентябрда 6595 кишида, 25 сентябрда 7212 кишида COVID-19’ қайд этилганди.