Арманистон бош вазири Никол Пашиняннинг фикрича, жаҳон ҳамжамияти Туркиянинг Қорабоғ ишига аралашишига йўл қўймаслиги керак. У бу ҳақда Тоғли Қорабоғ ҳудудида вазият чигаллашгани сабабли мамлакат халқига йўллаган мурожаатида маълум қилган.
«Биз Жанубий Кавказдаги катта уруш ёқасида турибмиз, бунинг оқибатида жуда аянчли ҳодисалар юз бериши мумкин. Уруш ҳудуд чегараларидан чиқиши ва кенг миқёсдаги ҳарбий ҳаракатларга айланиши ҳеч гап эмас. Жаҳон ҳамжамиятидан барча кучларни сафарбар этган ҳолда Туркиянинг мазкур можарога аралашмаслигини таъминлашни сўрайман», — дея Арманистон ҳукумат раҳбарининг сўзларидан иқтибос келтирган «ТАСС».
Арманистон ва Озарбайжон ўртасидаги Тоғли Қорабоғдаги низо 27 сентябрда яна юз берди. Иккала томон ҳам ҳарбий ҳаракатларни бошлаб юборган ва бир-бирини провокацияда, чегараларни бузиб, ҳужум уюштирганликда айбламоқда.
Вазият чигаллашаётган паллада Озарбайжон президенти Илҳом Алиев Туркия давлат раҳбари Ражаб Тоййиб Эрдўғон билан телефонда музокаралар олиб борган ва унда Анқара зарурат туғилганда Бокуга ёрдам беришга тайёрлигини маълум қилганди.
Ўнлаб кишилар ҳалок бўлган Арманистон ва Озарбайжон чегарасида аввалги қуролли тўқнашувлар июль ойи ўрталарида юз берганди. Шундан сўнг арманлар ва озарбайжонлар ўртасидаги тўқнашувлар икки мамлакатдан ташқарида, хусусан, Москвада содир бўла бошлади.
Сўнгги 30 йилдан буён Арманистон ва Озарбайжон ўртасидаги муносабатлар Тоғли Қорабоғ ҳудуди сабаб ёмонлашган. Минтақа Озарбайжон ҳудудида жойлашган бўлса-да, 1991 йилда унинг таркибидан чиққан. Тан олинмаган ушбу республика ҳудудида асосан арманлар истиқомат қилиб келади. Икки мамлакат ўртасидаги чегарада мунтазам қуролли тўқнашувлар содир бўлиб туради.
Изоҳ (0)