Коронавирус пандемиясига қарши кураш меъёрий ҳаётга қайтиш билан эмас, балки янада яхшироқ ҳаёт қуриш билан тугаши лозим, сабаби янги муқаддима томон имконият яратилмоқда. Бу ҳақда Италия бош вазири Жузеппе Конте маълум қилган.
«Кўринмас душман ҳаётимизни бузди ва ўрганиб қолган одатларимизга таъсир кўрсатди. Пандемия барча ҳудудлар ва дунё миллатларига таъсир қилди, инсоният учун навбатдаги синовга айланди. Мазкур фожиа бизни ўзгартирди, лекин у бир вақтнинг ўзида бизга янги муқаддима учун имконият яратмоқда», – деган Конте БМТ Бош Ассамблеясининг 75-сессиясида сўзлаган нутқида.
«Пандемия устидан ғалаба қозониш умиди аввалги меъёрий ҳаёт тарзига қайтиш имконини бериши ҳақидаги хоҳиш билан ҳамоҳанг бўлмаслиги керак. Биз кўпроғини исташимиз, ўйлаб топишимиз ва қайтадан янги дунё яратишимиз зарур: сабаби аввалги ҳаёт тарзи энг яхшиси эмас эди ва уни янада такомиллаштириш мумкин», – деган Италия ҳукумати раҳбари.
Мавзуга доир: Путин БМТга санкцияларни бекор қилишни таклиф этди
Конте Италиянинг 2021 йилдан бошлаб G-20 «Катта йигирмалик»га раислик қилиши бу ишларни амалга оширишда қўл келиши ҳақида ҳам гапирган. Конте мамлакатнинг асосий вазифалари сифатида «шахслар, сайёра, ривожланиш» формуласи бўйича ишлашни таклиф қилган.
«Биз глобал ва демократик миқёсда одамлар тенг ҳуқуқли бўлган, инклюзив жамият учун адолатсизлик ва ижтимоий тенгсизликка қарши курашиб, ўзгаришлар учун берилган имкониятдан унумли фойдаланмоқчимиз», – деган Конте.
Италия бош вазири мамлакатнинг коронавирус инфекциясига қарши вакцина яратилишидаги улуши ҳақида ҳам гапириб, бу дунё халқларининг бирлашувида улкан аҳамият касб этишини таъкидлаган.
«Биз Ер сайёрасининг ва болаларимизнинг келажагига худбинлик билан бефарқ қарамаслигимиз, дунёнинг кўплаб жойларида соғлиқни сақлаш масаласига эътибор қилишимиз керак», – дея нутқига якун ясаган Италия бош вазири.
Изоҳ (0)