Танзила Норбоева қонунларда коррупциоген ҳолатлар мавжудлигини таъкидлади

Олий Мажлис Сенати раиси Танзила Норбоева Ўзбекистон қонунчилигидаги камчиликлар ҳақида «Ўзбекистон 24» каналига берган интервьюсида гапириб ўтди.

«Парламентнинг асосий фаолияти тез қадамлар билан кетаётган ислоҳотларнинг қонуний асосларини яратиш ва мустаҳкамлашдир. Йиллар давомида ишлаб чиқилган қонунлар бугунги кун талабига жавоб бермаслигини кўрдик.

Қонунларда кўплаб коррупциоген ҳолатлар мавжуд. Уларда ислоҳотларга тўсиқ бўладиган кўплаб моддалар бор. Буларни бартараф қилиш бўйича Олий Мажлиснинг икки палатаси томонидан ҳам таҳлилий, ҳам қонунчилик ишлари амалга ошириляпти», – деди Норбоева.

Сенат раиси парламент олдида ижро ҳокимиятининг ҳисобдорлиги ошганини ҳам қайд этиб ўтган.

«Илгари қонунларда ёзилса ҳам, амалда бу нарса йўқ эди. Яъни парламентнинг ҳукуматни шакллантириши, ҳукуматнинг унинг олдида ҳисобдорлиги масаласи. Лавозимига лойиқми, лойиқ эмасми деган масала парламент аъзоларининг диққат марказида турибди. Бош вазирдан тортиб барча вазирлар лавозимига тайинланишида парламент муҳокамасидан ўтади.

Улар олдига қўйилган вазифаларни қай даражада бажараётгани бўйича қуйи ва юқори палатага ҳисобот бермоқда. Агар лавозимига лойиқ бўлмаса, парламент буни бемалол айта олади. Ҳокимлар ҳам ҳудудлардаги ислоҳотлар қай даражада амалга оширилаётгани бўйича парламентга ҳисобот беряпти», – деди Танзила Норбоева.

Сенат раиси интервьюси давомида парламентнинг ўрни нуфузи 3–4 йил давомида мутлақо ўзгарганини, унинг ваколатлари кенгайтирилганини маълум қилди.