Буюк Британияда COVID-19 билан боғлиқ вазият баҳордаги кўрсаткичга қайтмоқда. Ҳукумат қишда вазият ундан ҳам оғирроқ бўлишидан огоҳлантирмоқда

Буюк Британияда коронавирус тарқалиши билан боғлиқ вазият яна ёмонлашди. Reuters’нинг хабар беришича, бу ҳақда мамлакат бош санитар шифокори Крис Уитти маълум қилди. Бу хабарни The Telegraph ҳам тасдиқлаган.

«Буюк Британиядаги тенденция нотўғри йўналишда кетилаётганидан далолат бермоқда ва биз пандемиянинг кескин палласидамиз. Жуда қийин қиш арафасида вирус тарқалишини қандай қилиб назоратга олишни аниқлаш учун статистикани кузатяпмиз», — дея унинг сўзларини келтирмоқда агентлик.

Reuters’нинг қайд этишича, Буюк Британияда касаллик тарқалиши бутун мамлакат бўйлаб карантин жорий этилганидан сўнг камая бошлаган, бироқ қатъийроқ чоралар бекор қилинганидан кейин ва компаниялар ҳамда таълим муассасалари иши тикланганидан сўнг янги касалланиш ҳолатлари яна орта бошлаган.

Жонс Ҳопкинс маълумотларига кўра, Буюк Британияда 396,7 минг киши коронавирусга чалингани қайд этилган, уларнинг 41,8  минг нафари вафот этган. Мамлакатда касалланишнинг авж нуқтаси март апрель ойларида кузатилган бўлиб, кунига 5 мингдан ортиқ ҳолат аниқланган.

Май ойида эса, қатъий карантин жорий этилганидан сўнг касалланиш ҳолатлари сони камая бошлаб, июнь ойида энг паст кўрсаткич қайд этилган. Кунлик касалланиш ҳолатлари сони 400 кишидан ошмаган. Бироқ август ойида яна кўтарилиб, май ойи бошларидаги кўрсаткичга етган. 19 сентябрь куни мамлакатда 4,4 минг кишидан ортиқ COVID-19’га чалингани қайд этилган.

Telegraph’нинг ёзишича, мамлакатда эпидемиологик вазият ривожланишнинг кескин нуқтасига етаётгани ҳақида бош санитар шифокор Крис Уитти ҳукуматнинг бош илмий маслаҳатчиси билан бирга тез орада нутқ сўзлайди. Бош вазир Борис Жонсон ҳам «сўнгги огоҳлантириш» билан чиқиш қилади. Ҳукуматдаги манбага кўра, бош вазир британияликларни хавфсизлик  чораларига риоя қилиш ва касалланишни камайтириш мамлакат бўйлаб янги карантин жорий қилишдан сақланишнинг ягона йўли эканлиги ҳақида огоҳлантиради.

Аввалроқ Жонсон COVID-19’нинг иккинчи тўлқини муқаррарлигини айтганди. «Биз ҳозир иккинчи тўлқин яқинлашаётганини кузатяпмиз. Буни Францияда, Испанияда, бутун Европада кўрдик. Бу бизнинг мамлакатда ҳам кузатилиши муқаррар эканлигидан қўрқаман», — деган у ва Буюк Британияда иккинчи локдаун эълон қилиб иқтисодиётни тўхтатишни истамаслигини қўшимча қилган.