Microsoft асосчиси Билл Гейтс Fox телеканалига берган интервьюсида коронавирус пандемияси энг яхши ҳолатда 2022 йили якунланишини маълум қилди. Fox Гейтс билан интервьюни миллиардер томонидан асос солинган фонд COVID-19’га қарши курашга 650 миллион долларгача хайрияни амалга оширганидан сўнг эълон қилди, деб хабар беради «РБК».
«Эпидемия тахминан 2022 йилга бориб якунланади. Аммо вирус тарқалишига қарши кураш чораларига глобал даражада ёндашадиган бўлсак, 2021 йил давомида биз унинг тарқалиш кўрсаткичини камайтиришимиз мумкин. Худога шукр, вакцина технологияси ҳозирда бор, молиялаштириш ҳам етиб келди, компаниялар энг яхши мутахассисларни бунга жалб этган. Шу сабабли оптимистик жиҳатдан бу абадий давом этмайди деган умиддаман», — дейди Гейтс.
Гейтснинг фикрича, Қўшма Штатлар нормал ҳаёт тарзига вакцина яратиш соҳасида эрилишган ютуқлар сабаб 2021 йилнинг ёзига бориб қайта олиши мумкин. Шу билан бирга, Гейтс АҚШнинг камбағал давлатлар учун вакцина ишлаб чиқариб, уни тарқатишга ҳаракат қилмаётганидан ҳафсаласи пир бўлган.
Таъкидланишича, Билл Гейтснинг фонди томонидан коронавирусга қарши кураш йўлида хайрия қилинган 650 миллион доллар бу каби ташкилотлар томонидан амалга оширилган рекорд сумма ҳисобланади.
Аввалроқ Жаҳон соғлиқни сақлаш ташкилоти 2020 йилнинг октябрь—ноябрь ойларида Европада коронавирус оқибатида ўлимлар сонининг ортиши кутилаётганини маълум қилганди.
Эслатиб ўтамиз, шу йилнинг январь ойида Билл Гейтс Хитойга коронавирус билан курашиш учун 5 миллион доллар ажратганди.
Изоҳ (0)