АҚШ президенти Дональд Трампга рицин заҳарли моддаси солинган хат юборишда гумон қилинган Канада фуқароси бўлган аёл Нью-Йоркнинг Буффало шаҳридаги чегара пунктида ушланди. Бу ҳақда The New York Times газетасига таяниб Meduza хабар бермоқда.
Исми ошкор қилинмаган аёл АҚШ ҳудудига киришга уринган, унинг ёнидан ўқотар қурол топилган.
Қайд этилишича, у 2019 йилда Техас штати полицияси томонидан ҳибсга олинган. Ундан рўйхатга олинмаган қурол, сохта ҳайдовчилик гувоҳномаси ва муддати ўтган олти ойлик виза топилган. Шундан сўнг аёл мамлакатдан Канадага депортация қилинган.
Ўтган ҳафтада АҚШ президенти ҳамда Техасдаги тергов изолятори шериф офисига юборилган заҳарли рицин солинган хат махсус хизмат томонидан тўхтатиб қолган. Ҳуқуқ-тартибот органлари хатлар Канададан юборилганини маълум қилган. Хатлар юворилишини улар бирор бир халқаро террорчилик ташкилоти фаолияти билан боғламаяпти.
Рицин заҳарли моддаси солинган хат Дональд Трампга иккинчи марта юборилиши. Биринчи мартаси 2018 йилнинг октябрида юборилган. Ўшанда президент ва Пентагонга хат юборилишида гумонланиб АҚШ ҳарбий-ҳаво кучлари ветерани Уильям Клайд Аллен III қўлга олинган.
Трампдан аввал ҳам АҚШ президентларига заҳар солинган хат юборилган. Хусусан, 2014 йилнинг май ойида Барак Обамага заҳар солинган хат юборган шахс 25 йиллик қамоққа ҳукм қилинган. Ўша йилнинг июль ойида Техас штатида истиқомат қилувчи собиқ актриса Шеннон Ричардсонни рицин заҳарини тайёрлаб, уни президент Барак Обама ва Нью-Йоркнинг собиқ мери Майкл Блумбергга мактуб орқали жўнатгани учун 18 йиллик қамоқ жазосига маҳкум этилган.
Изоҳ (0)