Хитойнинг шимоли-шарқида жойлашган Цзилинь провинциясида Россиядан импорт қилинган музлатилган калмарлар қадоғидан коронавирус топилди, деб хабар бермоқда Meduza Sinxua агентлигига таяниб.
Маҳсулотларнинг ташқи қадоқларидан намуналар провинция пойтахти Чангчунь шаҳрида ўтказилган мунтазам текширув пайтида олинган. Икки марта тестдан отказилган ва икковининг натижаси мусбат чиққан.
Калмарларнинг вирус топилган қадоғини ушлаган барча кишилар тиббий кузатувга олинган. Уларда инфекция топилмаган.
Оғирлиги 10 килограмм бўлган шундай денгиз маҳсулотларининг яна бир партияси Фуюй шаҳрига келтирилган. Маҳаллий соғлиқни сақлаш идоралари маҳсулотга тегинган бўлиши мумкин бўлган кишиларни қидирмоқда.
Хабарда айтилишича, коронавирус зарралари Хитойга импорт қилинган маҳсулотлар орқали кириб келиши билан боғлиқ биринчи ҳолат эмас. 18 сентябрь куни шу сабаб билан Индонезиянинг PT. Putri Indah компанияси ишлаб чиқарган денгиз маҳсулотлари импорти вақтинчалик тўхтатилган. Август ойида вирус зарралари Хитой шарқига Эквадордан келтирилган креветкалар қадоғида топилган.
Хитой 2019 йилнинг декабрида янги коронавирус инфекцияси қайд этилган дунёдаги биринчи давлат бўлганди. Айни пайтда мамлакатда COVID-19’нинг маҳаллий ўчоқлари аниқланмоқда. Барча янги касалланиш ҳолатлари четдан кириб келган деб ҳисобланмоқда.
Изоҳ (0)