Жиззах вилояти Фориш туманида Lacetti ва «ГАЗ-3102» автомобиллари иштирокида йўл-транспорт ҳодисаси содир бўлди, дея хабар бермоқда ИИВ.
Маълум қилинишича, Фориш тумани «Нурак» маҳалласи ҳудудидан ўтувчи Жиззах–Қизилча 4/Р-36 йўлининг 48-километрида йўл-транспорт ҳодисаси рўй берган. Фориш тумани «Осмонсой» маҳалла фуқаролар йиғинида яшовчи, 1975 йилда туғилган М.А. акасига тегишли «ГАЗ-3102» русумли автоулов бошқарувини йўқотиши оқибатида йўлнинг қарама-қарши йўналишига чиқиб кетиб, Lacetti’га урилган.
Оқибатда Lacetti ҳайдовчиси, «Осмонсой» маҳалла фуқаролар йиғинида истиқомат қилувчи, 1989 йилда туғилган Ш.Э. чап оёқ болдир суягининг синиши ташхиси билан Фориш тумани тиббиёт бирлашмасининг жонлантириш бўлимига ётқизилган.
«ГАЗ-3102» ҳайдовчиси эса олинган тан жароҳатлари натижасида шифохонада кўрсатилган тиббий ёрдамларга қарамасдан вафот этган.
Ҳолат бўйича Фориш тумани ИИБ ходимлари томонидан суриштирув ҳаракатлари амалга оширилмоқда.
Изоҳ (0)